HIK HASIrekin batera argitaratu dute liburua Humanitate eta Hezkuntza Zientzien Fakultateko bi ikertzaileek.

“Espazioek eta materialek esperimentatzeko, manipulatzeko, esploratzeko, sortzeko eta jolasteko ateak irekitzen dizkiote haurrari”, eta haurren esperimentazio prozesu horietan bidelagun diren hezitzaileei laguntzeko liburua da sortu dutena.

Liburuak 11 kapitulu ditu, eta kapitulu bakoitzean, biziberritzearen alde egiteko hainbat ideia eta estrategia aurkitu daitezke. Guztira 365 proposamen egin dituzte, askotariko materialekin esperimentatzeko proposamenak dira. Hala ere, proposamenak aurkezteaz gain, liburuak irakurleari “bere sorkuntzari eta bere jarduteko moduari atea irekitzeko eta norberak bere proposamenak diseinatzeko” aukera zabaltzen dio.

Hausnarketa bideratu eta bide berriak irekitzen laguntzeko helburua duen liburua, eskoletarako ez ezik, hezkuntza ez formalerako, familietarako, … baliabide modura aurkeztu dute ikertzaileek.

Liburuari honen orrialdeetatik haratago bizitza emateko asmoarekin eta irakurleekin bestelako harreman bat eraikitzeko webgune bat ere zabaldu dute: www.biziberritu.eus.  

Bizi gara, gure munduan, gure moduan.
Bizi gara, materialen munduan, material soilen munduan.
Materialak bizi gaitu.
Materialekin bizi gara soiltasunez beteriko munduan.
Gure munduan eta gure moduan.
Aukera berriei atea irekiz, esperimentatuz, proposatuz, sortuz.
Gure munduan eta gure moduan.