Eusko Jaurlaritzaren COVID-19-aren kontrajarduteko protokoloak ezartzen du, federatu gabeko kirol-jarduera fisikoari dagokionez, jarduera hori banaka edo taldeka egin daitekeela, kontaktu fisikorik gabe eta talde mugatuetan. Era berean, jarduera hori aire zabalean edo ondo aireztatutako gune irekietan egitea gomendatzen du. Normaltasun egoera berri honen aurrean eta hainbeste hilabetez itxialdian egon ondoren, herritarren ohiturak aldatu egin dira. Gaur egun, ariketa fisiko gehiago egiten da aire zabalean eta eskola-kirolaren praktika eta kirol-instalazioen erabilera mugatua daude. Edonola ere, Osasunaren Mundu Erakundeak 5 eta 17 urte bitarteko pertsonek egunero, gutxienez 60 minutuz, intentsitate ertaineko edo handiko jarduera fisikoa egitea gomendatzen du. Jarduera fisikoak pertsonen osasunerako dituen onurak frogatuta daude. Gainera, mugikortasun aktiboak gizarteari ekartzen dizkion onurak egiaztagarriak dira: kutsadura atmosferiko txikiagoa, zarata gutxiago, berotegi-efektua eragiten duten gas gutxiago isurtzea, etab. Hau honela izanda, eskolara oinez joatea jarduera fisikoa sustatzeko aukera aparta da, sedentarismoa saihesteko eraginkorra dena gainera. Eskola-bideen ekimena baliatzeko unea da, izan ere, oso modu sinple eta onargarri batean gure ongizaterako hain beharrezkoa den eguneroko jarduera fisikoari minutuak gehitzen dizkiolako.

Eskolara lagunekin oinez joateak harremantzeko modu segurua izaten jarraitzen duelako

Hilabete hauetan zehar, pertsonen arteko harremanekin zer ikusia daukaten eremuak (erlazionatzeko moduekin, espazioekin eta dinamikekin lotutakoak) gehien kaltetuen artean koka genitzake. Esate baterako lagunekin ezin elkartzea, harreman-modu birtual berriak sortu beharra, familia-lotura zabal eta baliotsuak zaintzeko ezintasuna, etab. Osasun Sailak gomendio orokor batzuk ematen ditu koronabirusaren transmisioa prebenitzeko eta egunerokotasunari segurtasunez eta konfiantzaz aurre egin ahal izateko. Besteak beste, musukoa erabiltzea, eskuak garbitzea eta segurtasun distantzia mantentzea (gutxienez 1,5m), harremanak ahalik eta gehien murriztea eta bizikidetza estutik haratago ez zabaltzea, etab. Hala ere, distantzia fisiko honek ez du isolamendu soziala esan nahi. Izaki sozialak garen heinean, laguntza eta babes soziala izatea gure osasun adierazle fisiko zein psikologikoekin erlazionatuta dago.

Harremanak landu eta zaintzeak besteekiko dugun konfiantza handitzen laguntzen digu, eta epe luzera, gizarte-kohesioa hobetzen laguntzen du gizarte-sarea hedatuz. Eskolara oinez joateak lagunekin harremantzeko denbora gehiago eskaintzen die haurrei, lagunekin gela, jolastokia edo jangela partekatzeaz harago. Bizitza osorako edo, gutxienez, norberaren nortasuna garatzeko garrantzitsuak diren harremanak sendotzeko eta estutzeko baliogarria da. Osasun-berme guztiekin eskolara oinez joateak harreman sozialak errazten laguntzen ditu.

Eusko Jaurlaritzako Osasun Publikoaren eta Adikzioen Zuzendaritzaren, Osasuna Sustatzeko Arloko arduradun teknikoek, Euskal Herriko Unibertsitateko (UPV-EHU), KideON ikerketa-taldeak eta Haurren Hirien Sareak (Solasgune eta Innobasque) egindako txostenetik ekarritako testua.