Asma da haurtzaroko gaixotasun kroniko nagusienetako bat, eta patologia horren alderdi klinikoak eguneratzen dituen gida berria kaleratu dute regAp izenpean batu diren Espainia mailako sei sozietate pediatrikoko osasun adituek.

Gida berriak Asma en pediatria, Consenso regAp du izenburua, eta 2007an kaleratutako gida eguneratzera dator. Haurren eta nerabeen asmari buruzko oinarrizko ezagutzak eguneratzen ditu.

Osasungintzako profesionalei zuzendutako gida da, baina baita ere ikastetxeetako hezitzaileei, erizainei edota haur asmatikoak dituzten familiei. Espezialitateko hainbat adituk hartu dute parte, tartean Gurutzetako Ospitaleko Pediatriako Larrialdi Zerbitzuko kide Natalia Paniaguak.

Gida horretan pediatrek atal berezia eskaini diote SARS-CoV-2 birusak eragindako COVID-19ri. “Une honetan eskura dugun informazioarekin, esan dezakegu haurrek eta nerabeek sintomarik gabeko edo sintoma arinekin pasatzen dutela koronabirusagatiko infekzioa, eta ez dirudi asmak arrisku-faktore gisa jokatzen duenik. Hala ere, kasu larriak ere gerta daitezke eta birusa herritarren artean ez transmititzeko neurri orokorrak gomendatzen jarraitu behar dugu. Horrekin batera, larriagotzeak prebenitzeko azpimarratu behar dugu mantentze-tratamendua behar duten haur asmatikoek horiekin jarraitu behar dutela”, adierazi du Natalia Paniagua sendagileak.

Gidan azaltzen dute ez dirudiela COVID-19ak arrisku-faktore moduan jokatzen duenik asma gaixoentzako, ez umeetan ez helduetan. Ohartarazten dute, hori bai, oraingoz ez dagoela ziurtasun osorik, baina gaur egun eskuragarri dauden datuetatik hori ondoriozta daitekeela.
Hala ere, hainbat gomendio ematen dituzte sektoreko profesionalek. Horien artean daude kutsatzeko arriskua murrizteko beharrezkoak diren neurri guztiak hartzea zein asma kontrolpean mantentzeko tratamenduekin jarraitzea eta horiek sustatzea larriagotzeak prebenitzeko eta arreta presentzialaren beharra saihesteko. Horrez gainera, haur asmatikoen gripearen aurkako txertaketa gomendatzea dute, bereziki pandemia aktibo dagoen bitartean.

Higiene- eta saiheste-neurriak zorrozteko eta etxeko alergenoen eta kutsatzaileen aurrean zuhurtziaz jokatzeko ere gomendatzen dute, eta tabakoaren aipamen berezia egiten dute.