Asma da haurtzaroko gaixotasun kroniko nagusienetako bat, eta faktore genetikoen eta ingurumen-faktoreen elkarreraginaren emaitza dela. Joera aldakorrekoa da eta aurreikus ezin daitekeena. Gainera, erremisio- eta okerragotze-aldiak ditu.

Bizitzako lehen urteetan, haurren herenek baino gehiagok dute bronkioetako buxadura-gertaeraren bat, eta horien erdiek gertakari errepikariak izan ditzakete. Beraz, asmatikotzat diagnostika daitezke. Haur horietako asko berez hobetu daitezke, baina zaila da kasu bakoitzean izango duten bilakaera iragartzea.

Asmaren sintomak

Asmaren sintomen artean eztula ohikoa eta goiztiarra da. Arnasketa zaratatsua ere bai; fonendoskopioarekin zein fonendoskopiorik gabe entzuteko modukoa da. Sibilantziak dira gaixotasunaren soinurik bereizgarriena. Haur helduek disnea, mina edo bularraldeko zapalkuntza adieraz dezakete.

Sarri, goiko arnasbideko arnasketa-infekzio batek eragiten du asma-krisia, eta egun gutxiren buruan pasa daiteke. Baina astebete ere iraun dezake edo hortik gora ere bai. Krisi-mota hori da nagusi eskola umeen artean.

Krisien maiztasunak, horien intentsitateak eta krisialdien arteko sintomek lagunduko dute asmaren larritasuna neurtzen, tratamendua doitzen eta kontrol-maila zehazten.

Asma, sarri, askotariko alergiekin lotzen da: akaroei, polenei…

Hezkuntza terapeutikoa giltzarri

Asma sendatzeko tratamendurik ez dagoenez helburua da haurra sintomarik gabe edo ahalik eta sintoma eta exazerbazio gutxienekin mantentzea. Hala diote pediatra espezializatuek Asma en pediatria, Consenso regAp gida berrian.

Adituek diote tratamendu egokiarekin, asma guztiz edo ia erabat kontrola daitekeela kasu gehienetan. Asmaren tratamendua, gainera, pazientearen eta osasun-profesionalen arteko lankidetzan oinarritzen da, eta indibidualizatua, adostua eta etengabe doitua izan behar du une bakoitzean pazientearen beharrak aldakorrak izan daitezkeelako.

Haurren asmari heltzeko beste alderdi garrantzitsu bat hezkuntza terapeutikoa da; izan ere, frogatuta dago ezagutza onak teknika egokiekin eta auto-zaintza lan onarekin gaixoek gutxiago jasaten dituztela asma krisiak, eta ondorioz, bizi-kalitate hobea dutela.