Neguak izan dituen ezaugarriak kontuan hartuta pediatra alergologoek ohartarazten dute polen ekoizpena handia izan daitekeela udaberri honetan, eta hainbat gomendio eman dituzte. Horien artean daude FFP2 maskara homologatuak erabiltzea eta tratamendu prebentiboak zein erreskatezkoak betetzeko.

Tenperatura hotzek, euriteek eta neguko elurteek landareen hazkunde handiagoa eta polen produkzio handiagoa eragingo dute. Hori horrela, udaberri honetan polinizazioa aurrekoan baino handiagoa izango dela uste dute adituek. Egun haizetsuetan, lehorretan eta eguzkitsuetan handitu egiten da giroan dagoen polen kopurua, eta horrek airearen kutsadura handiagoa eragiten du, bertako partikulek polen esekia biltzen baitute. Aldiz, gun hezeetan edo euri-egunetan murriztu egiten da kontzentrazio polinikoa. “Aurten egun hotzak izan ditugu neguan, izozteak eta elurteak izan ditugu, eta, ondorioz, landareek sustrai sakonagoak dituzte, sendoagoak dira eta elikagaiak hartzeko gaitasun handiagoa dute, eta horrek polen gehiago ekoiztea eragiten du. Bestalde, kutsadurak eragindako arazoak gehitu behar dira, landareen polinizazioan ere eragiten baitute”, adierazi du SEICAP taldeko alergia, arnasketa eta asma lantaldeko kide Javier Torresek.

Urteak dira planeta osoan tenperaturak gora egiten duela, eta, ondorioz, polinizazio-aldiak lehenago hasten dira eta, gainera, luzeagoak eta biziagoak dira. “Era berean, ikusten da zenbait landare-espezie urtetik urtera habitata handitzen ari direla, eta pixkanaka hedatzen ari direla aurrez ez zeuden eremuetan”, dio Torres doktoreak. Horren adibide da anbrosia; izan ere, datozen hamarkadetan hazkunde handia aurreikusten da Europa mendebaldeko biztanleen sentsibilizazio-maiztasunari dagokionez.

Pandemian errinitis alergikoa duten haurrak, pandemian

Errinitis alergikoa duten haurrentzako eta haien familientzako garrantzitsua da arnas infekzioarekin, hotzeriarekin edota COVID-9arekin lotutako sintomak bereizten. “Sintoma batzuk bat etor daitezke, baina badakigu COVID-19 birusaren zantzu nabarmenak direla eztula, sukarra eta usaimena galtzea. Sudurreko kongestioa, pruritoa eta konjuntibitisa, berriz, errinitis alergiko baten sintomak dira”, azaldu du Torres doktoreak.

Pediatra alergologoek gomendatzen dute polenari alergia dioten haurrek FFP2 maskara homologatuak erabiltzea. Maskara kirurgikoak baino eraginkorragoak dira airean esekitako partikulak iragazten. “Partikulen %95 iragazten dituzte eta, gainera, aurpegira gehiago egokitzen dira. Kirurgikoek ere partikulak iragazten dituzten arren, ez dira hain estu geratzen eta polenak igaro ditzakeen zulo gehiago uzten dituzte. Gainera, maskara kirurgikoak besteak babesteko dira eta FFP2 maskarak eramailea ere babesten dute airean esekitako partikuletatik”.

Maskara eramateko gomendioarekin batera prebentziozko eta erreskateko tratamenduak betetzearen garrantzia ere gogorarazi dute pediatra alergologoek.