Euskaltzaleen Topaguneak Proiektu Azoka 2021 egin zuen larunbat goizean eta bertan euskara elkarteetatik bultzatutako zortzi egitasmo arrakastatsu eta esportagarri aurkeztu zituzten.

Lasarte-Oriako Ttakun elkartearen Gurasoleku egitasmoaren berri eman zuen elkarteko ordezkari Jokin Guridik eta gurasotasunarekin duen lotura estuagatik ekarri dugu gurera.

Guridik azaldu zuen 0-5 urte bitarteko umeak dituzten familiei zuzendutako proiektua dela; bereizten dituzte, gainera, 0-2 eta 2-5 urte tarteak. “GurasoLeku da familia barneko hizkuntza transmisioa bermatzeko programa bat. Ikusten genuen eskolak paper garrantzitsua duela euskara ikasteko prozesuan, baina Lasarte-Orian familia asko daudela non haurrak D ereduan egonda ere gurasoek euskara ez jakiteak eragina duen transmisioan. Hala, esparru horretan eragiteko programa bat da GurasoLeku, eta 2016tik dago martxan. Fase desberdinetan egon da, baina esan daiteke azken hiruzpalau urteetan bere osotasunean dagoela martxan”, azaldu du.

Ehun bat familiak parte hartzen dute urtero, eta normalean azarotik ekainera gauzatzen da. “Eskoletako ikasturte hasierako guraso bilerak baliatzen ditugu programa aurkezteko. Eta programak hiru eremu ditu: GurasoLandia, GurasoTegi eta GurasoLagun”.

GurasoLandia: aisialdi eskaintza bat da. Espazio bat eta dinamizatzaile bat eskatzen ditu. Arrakasta dezente edukitzen du; izan ere, konpromiso gutxien eskatzen duen eremua da. Ordubetez euskaraz ondo pasatzeko leku bat da.

GurasoLagun: gurasoentzako mintzapraktika formatua da. Gehienetan umeak eskolan daudenean elkartzen dira gurasoak. Ez da baliabide berezirik behar.

GurasoTegi: gurasoentzako euskara eskolak dira. AEKrekin batera egiten dira, eta euskaltegian ematen dira eskolak.

Iturria: Txintxarri.eus.

Elkarlana eta komunikazioa

Ttakun da GurasoLeku egitasmoaren bultzatzailea, baina eragile desberdinen artean gauzatzen da, eta elkarlan horrek berebiziko garrantzia du. “Lantalde finko bat osatu da eta daude bi eskolak, bi guraso elkarteak, haur eskola, Udala eta AEK euskaltegia. Zergatik da garrantzitsua elkarlan hori? Operatiboki tutoreak direlako programa hori eskaintzen dutenak familia eta guraso bakoitzaren egoeraren arabera. Gainera, eragile desberdinek ideia eta iritzi desberdinak dituzte eta askotariko ekarpenak egiten dtiuzte. Hala, denen artean aberastu egiten da programa”.

Komunikazioa ere oso garrantzitsua da kontuan hartuta eragile desberdin daudela.

Informazioa gehiagorako: Ttakun elkartea. 943 37 14 48 harpidetza@ttakun.eus