Ama izateko adin egokia hausnarketagai

Laura Gutman jarraitzaile asko dituen idazle argentinarra da, eta giza jokabideen inguruan egindako lanengatik egin da ezagun. Amatasuna eta adina lotzen dituen sarrera egin du bere blogean. Defendatzen du 40 urtetik aurrera ama izateak ez duela ez kontraindikaziorik ez arriskurik. “Ama izateko adin ideala aldatu egiten da kulturaren, sinismen erlijiosoen, ezaugarri geografikoen edo une historikoaren arabera. Ezin dugu inolaz ere esan umeak izateko adin hobeak daudenik eta are gutxiago esan zenbait adin ez egokiak direnik amaren edo/eta umearen osasunerako”.

Gutmanek dio ama izateko adin egokiaren gaia ez zela eztabaidagai arbasoendako. “Emakumeek, besterik gabe, 14 eta 20 urte bitarteko epean izaten ziren ama. Mendebaldeko gizarte moderno honetan, ordea, gazteegia izatea ere arriskutsutzat jotzen da”.

Lehentasun berriak

Gutmanek azaltzen du emakume modernoak ikastea, etxetik kanpo lan egitea eta autonomiaren eta askatasunaren bidean aurrerapausoak egitea erabaki duela. Argentinarrak 1.968ko mugimendu soziala, AEB-ko hippy mugimendua, Europako mugimendu feminista eta antisorgailuen hedapena aipatzen ditu mugarri modura. “Lehentasuna ematen diogu gure bidaia pertsonalari”.

Ordulari biologikoa

Gutmanek zilegi jotzen du gaur egungo emakumeak 40 urteren bueltan ibiltzea ordulari biologikoaren hotsa entzuterako. “Kontua da ama izan nahi dugula, eta 40 urte edo akaso 45 diugula. Eta zein da arazoa? Ez dago arazorik. Soilik aurreiritziak, beldurrak eta ingurutik datozen funtsik gabeko fantasiak”, dio Gutmanek.

Gogor hitz egiten du Gutmanek. Ez du daturik ematen, baina ziurtatzen du garrantzitsua dela argitzea ez dagoela arriskurik. Emakumearen gorputza gertu dagoela adin horretan ere haurdunaldi bat burutu eta arazorik gabe erditzeko.

Ze iritzi duzu zuk?

Artikulua osorik eta argazkiaren iturria hemen.