Gurasook dugun lanik zailena, seguruenik, seme-alabak beren bertsiorik onenera iristea da. Errezeta maitasuna, arauak eta mugak dira Francisco Castañorentzat. Irakaslea da eta baita ere aprendeaeducar.org proiektuko sortzaileetako bat. La mejor versión de tu hijo –Zure semearen bertsiorik onena– liburua argitaratu du Plataforma Actual argitaletxearekin.

“Lehen errazagoa zen heztea”, dio. “Gizarte xumeago batean bizi ginen. Gaur egun, sare sozialekin, Internetekin, telebistarekin… input asko daude.
(…) Erronka berriak daude, eta horiei aurre egiteko prest egon behar dugu”.

Adituaren iritziz gehiago hezten dugu egiten dugunarekin esaten dugunarekin baino. “Koherenteak izan behar dugu. Esaterako, puntuala ez banaiz ezin diot eskatu semeari hala izateko, nire autoritate morala galtzen dudalako”.

Seme-alabek maitasun handia behar dute

Seme-alabek maitasun handia behar dutela azpimarratzen du Castañok. “Janaria baino gehiago, begira! Baina hau ez dago kontrajarria mugak jartzearekin eta irmoak izatearekin. Eta irmoak izatea ez da autoritarioak izatea, muga eta arau batzuk jartzea baizik”.

Emozioen kudeaketa ere garrantzitsua dela deritzo. “Adibidez, zure semeari mugikorrarekin jolastea gustatzen bazaio, kentzen diozunean negarrez hasiko da edo haserretu egingo da. Aldiz, haserretu behar ez duzuna zu zara. Badakizu hori gertatuko dela. Edo, adibidez, semea oso ordenatua ez bada, badakit gela ez dela oso txukun egongo, baina ezin naiz haserretu. Ordenatzea lortzeko estrategia bat bilatu behar dut. Eta hemen ondorioak sartzen dira jokoan. Ni ez naiz berarekin haserretzen arropa saskitik kanpo uzteagatik, ulertzen dut, desordenatua da, baina estrategia bat bilatzen dut ikasteko”.

Hezteko ilusioa

Seme-alabekin ilusioa behar dela azaltzen du Castañok. “Ilusioa behar da, ez halako edo bestelako helburuetara iristeko grina. Espektatibak sortzen badituzu, galduta zaude; izan ere, seme-alabek zure espektatibak betetzen ez badituzte, zapuztu egingo zara, eta gazteari autoestimua kenduko diozu. Ilusioa da garrantzitsua. Seme-alabei laguntzeko ilusioa izan behar da, haiek beraien bertsiorik onena bilatzeko. Zure semeak edo alabak arotza izatea nahi badu zure zeregina da munduko arotzik onena izaten laguntzea”.

Elkarrizketa osorik gazteleraz hemen.