Gaur, egubakoitza, argitaratu den Puntua aldizkariko Adituen esanetan atalean, haur loaren gaia landu du Leire Azpiazu erizain eta lo adituak. Bertako artikulua ekarri nahi izan dugu. Jarraian duzue, osorik.

Guraso askoren kezka

Badakigu jaioberriek eta haur txikiek loa garatu beharra daukatela gau osoan lo egin ahal izateko. Baina, kasu batzuetan, familien atsedena lortzeko eta haurraren ongizaterako laguntza behar izaten dugu; betiere, familiak horrela nahi badu. Esnaldi fisiologikoak haurrak 2 urte bete arte gertatzen dira. Baina zergatik gertatzen dira esnaldiak? Zerbait egin beharra dago? Galdera hauei erantzuna emango diegu gaur.

Loa zikloetan banatzen da

Lehendabizi, loaren biologia nolakoa den ikusiko dugu. Loa, txiki zein nagusietan, zikloetan banatzen da. Eta ziklo bakoitzak etapak ditu. Gauean zehar hainbat ziklotatik pasatzen gara, behin eta berriz errepikatuz. Helduetan ziklo bakoitzaren iraupena 90 minutukoa izan daiteke eta jaioberrietan, 40 minutukoa. Ziklo aldaketa horietan mikroesnaldiak gerta daitezke eta, batzuetan, esnaldi horiekin konturatzen ez garen arren, beste batzuetan, esnaldiak luzeagoak izaten dira, eta orduan, lo jarraitzea gehiago kostatzen zaigu.

Badakizu, orain, zure haurrak 40 minutu inguru lo egitearen arrazoia zein den?

Eguneko siestaren garrantzia

Haur txikien kasuan, egoera hori oso ohikoa izaten da; eguneko siestetan, batez ere. Guraso askok komentatzen dute beraien haurrak siesta laburrak egiten dituela, eta horren arrazoia aurretik azaldutakoa da. Oso garrantzitsua da zure haurrak siesta egokiak izatea eta atseden ona lortzea. Horrela lortuko dugulako gaueko atseden egokia. Eguneko edozein siestak, 6 hilabetetik aurrera, 30 minutukoa baino luzeagoa izan behar du atseden egokia lortzeko.

Zergatik 6 hilabetetik aurrera?

Adin horretatik beherako haurrei ezin zaielako loaren egitura bat ezarri. Beraien beharrei erantzun behar diegu, ordura arte ez baitute erritmo zirkadianoa guztiz ezarrita.

Erritmo zirkadianoa

Zer da erritmo zirkadianoa? Egunaren eta gauaren arteko desberdintasuna nabaritzeko gaitasuna da; alegia, gaua eta eguna bereizten hasten diren momentua. Egia da 3-4 hilabetetik aurrera haurrak gaitasun hori garatzen hasten direla, baina ez da guztiz ezartzen 6 hilabetera arte.

Beraz, hor daukazu lo entrenamenduak 6 hilabetetik beherako haurretan ez egitearen arrazoia. Adin horretatik beherako haurretan ezin ditugu ezarri entrenamendu jakin batzuk haurraren loa hobetzeko. Baina badaude loari lagun diezaioketen tip edo aholku batzuk. Adibidez, bere lo orduak aztertu eta pixkanaka horiek errespetatzen joan, siestak zein maiztasun eta ordutan egiten dituen ikusi, eta 4 hilabetetik aurrera argitasuna zaindu.

Gero, sei hilabete bete ostean, loaren estruktura bat ezarri dezakegu. Orain arte egin dituen lo orduak ikusita, jakingo dugu zer-nolako lo-leihoak dituen, eta, beraz, bere beharrak zeintzuk diren jakingo dugu. Adin horretan, hiru siesta egingo ditu haurrak, normalean, bederatzi hilabete bete arte. Orduan, bi siesta egitera pasako da, 18 hilabete betetzen dituen arte.

Haur guztiek ez dituzte lo behar berak, eta, batzuetan, 9 hilabete bete aurretik bi siesta egiten dituzten haurrak egongo dira; eta alderantziz, adin horretara heltzean hiru siesta mantendu beharra daukatenak. Horiek orientazio gisa erabiltzen ditugun datuak dira, baina oso garrantzitsua da profesional batek balorazio pertsonala egitea.