Txepetx batek amets baten bila egiten duen bidaia kontatuko duen ipuin ilustratu bat egiten ari da Ione Larrañaga antzuolarra, Alkizako Udalaren Sormenaren Kabia bekari esker.

6 eta 8 urte bitarteko umeei zuzendutako ipuina da eta hori sortzeko jarraitu dituen pausuak azaldu ditu Larrañagak bideoan.

Azaldu du bekari esker Alkizan eman dituen lehenengo egunak antolaketarako baliatu zituela. Istorioa kontatzeko, storyboard batetik hasten dela, modu eskematikoan. Eta hauxe gaineratu du: “Hortik saiatzen naiz irudiak ateratzen, nahiz eta, nire kasuan, askotan, irudiak aurretik pentsatuta izaten ditudan. Burura lehenago etortzen zaizkit irudiak testua bera baino. Marrazkiak paperean eta arkatzez egiten ditut, eta, paperean egindako hori digitalizatu ondoren, ordenagailuan lantzen ditut: lehenengo, marrazkiak garbitu, eta, ondoren, koloreztatu”.

Koloreei garrantzia ematen diela ere azpimarratu du eta berak askotan erabiltzen dituen urdinak eta berdeak erabili ditu lan honetan ere.

Orain, azken ukituak ematen dabil eta abenduaren 17an aurkeztuko du Alkizan bertan.