Hilean behin, larunbatetan, BASH taldearen gidaritzarekin, aniztasun funtzionala duten gazteendako saioak egiten ari dira Arrasaten. Hamasei gazte inguru izaten dira saioetan normalean, baina apur bat gehiago ere aritu ziren larunbatean. Izan ere, saio inklusibo berezia egin zuten goizean, guztira hemezortzi izan ziren eta gonbidatu bereziak ere izan zituzten.

Aniztasun funtzionala duten gazteekin sormena eta askatasuna bultzatzen dituzte BASH taldean, dantzaren eta musikaren laguntzarekin. Hiru urte daramatzate Arrasaten lan egiten, baina larunbateko saioarekin “are inklusiboagoa” egin nahi izan zutela azaldu zuen bertako koordinatzaileetako bat den Ane Davilak: “Gaurkoan, adibidez, Beñat Barrutiak eskaini digu ilusio handiz prestatutako saio bat, eta gainerako gazteek ere erreferente bezala ikus dezakete”.

“Protagonista izatea”

Davilak azaldu duenez, “osagai nagusia ondo pasatzea da”: “Barre egitea, jende berria ezagutzea…baina batez ere espazio seguru batean egotea, beraien autentikotasun hori ezagutzera ematea modu librean”. Konfiantza hori lantzeko, programak jarraikotasun bat izatearen garrantzia azpimarratu du: “Bakoitzaren beharrak ezagutu, gustatzen zaiena identifikatu eta beraien pertsonetara egokitzeko aukera emate du. Lehen saioetan adibidez ikusten da lotsatuta egoten direla, baina behin konfiantza hartuta, ideiekin etortzen dira, edo koreografiak eskatzen dizkigute. Azken batean, beraiek protagonista izatea nahi dugu”.

Senideen garrantzia

Senideek ere parte hartu zuten larunbateko saioan: “Orain arte gurasoek atzetik ikusi dute prozesua, hiru urtean zehar. Benetan ez zekiten nolakoak ziren espazioak eta oso garrantzitsua iruditzen zaigu beraiek ere honen parte egitea”.