Arizmendi ikastolako DBH 2. mailako ikasleek trantsizio energetikoaren bueltan ikasgelan landutakoa kalera atera dute. Debagoiena 2030 ekimenarekin bat eginez, Aretxabaletan eta Eskoriatzan hainbat ekintza egin dituzte, betiere trantsizio energetiko kolektibo baten beharra aldarrikatzeko. “Mundu guztiak ulertu behar du horrela ezin dugula jarraitu; bakoitzak bere aletxoa jarri behar du egoera hobetzeko”, adierazi dute.

Aretxabaletako plazan elkartu diren ikasleek hainbat txoko egokitu dituzte. Txoko informatiboan esku-orriak banatu dituzte, haur eskolako umeek betetzeko mural parte-hartzailea izan dute eta jolaserako beste lau txoko ere izan dituzte. Belaunaldi berriak funtsezkoak izango direlako trantsizio energetikoa gauza dadin, Ainhoa Barberan irakasleak zehaztu duenez: “Belaunaldi berriak izango dira beharrezkoak diren aldaketa hauek guztiak martxan jarriko dituztenak; proiektu luzea izan da eta gaurko ekitaldi honekin borobilduko dugu. Espero dugu fruituak emango dituela…”.

Energia berriztagarrien aldeko apustuaren beharra

Aretxabaletako plazan irakurri duten manifestuak jasotzen duenez, energiaren erabilera ez da jasangarria gaur egun: “Noizbait geratu ahal gara pentsatzen gure energiaren erabilera jasangarria eta bideragarria den? Galdera honen erantzuna topatzeko aztertzen egon ostean, eta bilaketa luze baten ondoren, azkenean erantzuna topatu dugu. Azkenengo urteetako datuak landuta eta ulertuta, ondorioztatu ahal da ezetz, gure energia ez dela ez bideragarria, ez jasangarria”.

Eguneroko bizitzatik hasi behar da

Eguneroko bizitzan aldaketa zehatzak proposatu dituzte ekitaldiaren amaieran, herritar guztiok egin ditzakegunak: “Lehenik eta behin, etorkizuna latza izan ahal da, baina aldatzeko aukera dugu herrietan plaka solar gehiago jarriz. Udaletxeak plaka solarren eskaintza gehiago jarri beharko zituen. Gainera, ezin gara bizi halako jokamoldeak zigortzen ez dituen sistema batean, horretarako gauero etxetresnak deskonektatu beharko genituzke. Herritar denek egiten badugu hau, energiaren kontsumoa asko gutxituko da. Horrez gain, trantsizio energetiko kolektibo bat egiteko ez diogu bakarrik energia berriztagarriei erreparatu behar, baizik eta, gure ohiturei ere erreparatu behar diegu, aldaketa bat sumatu nahi badugu. Hori dela eta, etxe guztietan dutxa soilik erabili beharko zen. Zeren eta, bainu-ontzietan ur asko alferrik galtzen da. Amaitzeko, datuak aztertuz gero, ikusi ahal da gure argiztapen ohikoa ez dela batere efizientea. Honegatik, herriko kaleetan eta etxeetan led argiak egon beharko ziren soilik, eta ez orain ditugun argi arruntak.