Euskal Autonomia Erkidegoan 129 jazarpen kasu identifikatu zituzten 2020-2021 ikasturtean. Aniztasunerako eta Hezkuntza Inklusiorako zuzendari Lucia Torrealday eta Hezkuntza Ikuskaritza zerbitzuko ikuskatzaile nagusi Maite Ruizek aurkeztu dituzte Hezkuntza Ikuskaritzak bildutako datuak gaur.

Hezkuntza Ikuskaritzak 966 kasu aztertu ditu, eta %13,35 izan dira jazarpen modura identifikatuak. Aurreko ikasturteko datuekin alderatuta, aztertutako kasuen kopuruan igoera nabarmena izan –795etik 966ra–. Berdina gertatu da jazarpen gisa identifikatutako kasuetan ere –100etik 129ra–.

Torrealdayk zein Ruizek azpimarratu dute nabarmen egin duela gora aztertutako kasuen kopuruak, eta bilakaera hori zuzenean lotu dute gizartean zein hezkuntza komunitatean gaiarekiko dagoen sentsibilizazio handiagoarekin. “Ikastetxeek eta Hezkuntza Ikuskaritzak arreta handiagoa jarri dute gai honetan, eta, horren ondorioz, zalantzarik txikienaren aurrean, balizko kasu oro aztertu egiten da. Halaber, datu hauek azaltzen dituzten arrazoien artean nabarmentzekoa da Ikuskaritzak azken urteetan gai honen aurrean hartu duen jarrera aktiboagoa ere”, esan dute.

Kasu gehien Bigarren Hezkuntzan eta ziberbullying-arekin lotuta

Jazarpen gisa identifikatutako kasu gehien Bigarren Hezkuntzan gertatu dira: 129 kasu horietatik 78 etapa honi dagozkio (12-18 urte), kasu guztien %60,5.

Azpimarratzekoa da, bestalde, identifikatutako 129 kasu horietatik 41ean (%31,7) jazarpena nagusiki Internet, sare sozialetatik edo bestelako bitarteko zibernetikoren baten bidez gertatu dela.

Bizikasi ekimena

Hezkuntza Sailak duela bost urte abiarazi zuen Bizikasi ekimena. Eskola-jazarpenaren aurkako eta bizikidetza positiborako ekimena da. Lehenik eta behin BAT –Bullying-aren Aurkako Taldea– izeneko taldeak sortu ziren ikastetxeetan, eta prestakuntza eman zitzaien. Ondoren etorri zen jazarpenari aurre egiteko prestakuntza. Lehenengo ikastetxe publikoetako irakasleena zein familiena eta irakasle ez diren langileena. Gerora, hala eskatu duten itunpeko ikastetxeetan ere egin da.

Materiala ere sortu da gaiaren inguruko informazioa zein orientabideak emateko. Horretarako prestatutako webgunean dago ikusgai.

Jardunaldi berezia Bilbon

Hezkuntza Sailak Ongizate emozionala eta bizikidetzarekin denok bat jardunaldi berezia antolatu du martxoaren 30 eta 31rako. Bilboko Euskalduna jauregian izango da. Bizikidetzan eta bizikidetzarako hezteko erronkari eta erantzukizunari buruz gogoeta egiteko elkargunea izan nahi du kongresu honek.