Haurrek egiten duten pantailen erabilera kezka iturri bilakatu da azkenaldia, baita Antzuolako Herri Eskolako irakasleen eta gurasoen artean ere. Horregatik, Amaia Arroyo Sagasta hezitzaile digitala izan dute bidelagun saio ezberdinen bitartez.

Haurrek egiten duten pantailen erabilera kezka iturri bilakatu da. Eta Antzuolako hezkuntza komunitatea ere arduratuta dago. Hala, Pausoka guraso elkarteak antolatuta, Amaia Arroyo hezitzaile digitalak hainbat gako eman ditu bi saiotan. Izan ere, bai gurasoak eta baita irakasleak ere bat datoz: pandemiak pantailen erabilera areagotu egin du, eta erabilera arduratsuaren aldeko hautua egitea nahitaezkoa da.

Lehenik eta behin, erabileraren gainean hausnartu behar dela dio Arroyok, eta erabilera ona bultzatzeko bidelaguntza eskaini: “Gure lasaitasunerako, pantaila aurrean bakarrik uzten ditugu, maiz, haurrak; baina, modu gradual batean, pantailen munduan sartzeko laguntza behar dute. Hala, ikuspegi kritikoa landu behar dugu, pixkanaka, eurekin”.

Jarraibideak

Haurraren autonomia eta konfiantza lortzeko hainbat etapatan zein jarraibide progresibo izan beharko liratekeen azaldu du: “0 eta 3 urte arte, ahalik eta pantaila gutxien gomendatzen dute; 6ra arte, euren gailu pro- piorik ez edukitzea eta beti lagunduta erabiltzea; 6tik 9ra, berriz, espazio irekietan erabili ahal dituzte gailuak, betiere, laguntzarekin; eta 9tik 12ra bitartean, autonomia pixka bat utzi diezaiekegu. 12tik aurrera, lan ona egin dugula ikusita, autonomia utzi behar zaie”.

Errudun sentitzea

Hain zuzen, solasaldian guraso askoren artean sortutako sentimendua kulparena izan da. Arroyok momentu eta familia guztiak ezberdinak direla deritzo: “Epaiketa zein errudun sentsazioa ahaztu egin behar dugu; une guztietan ez gaude berdin; ezta familiak eta testuinguruak ere. Gainera, pantailen erabilera, batzuetan, baliagarria da, eta zilegitasun hori ere eman behar zaio”.

Komunitatearen elkarlana

Etxean ez ezik, eskola eremuan ere pantailen erabilera geroz eta handiago da, eta hor desorekak sortzen direla ere badio Arroyok: “Hezkuntza komunitate moduan ulertu behar dugu; zerbait elkarrekin sustatu behar dugu eta oreka bilatu pantailen esposizioa neurrigabea izan ez dadin. Haur Hezkuntzan, esaterako, etxean pantailak asko erabiltzen dira; ez, aldiz, eskolan eremuan”.