Igelaren teknika haurrei eguneko tentsioak lasaitzen laguntzeko teknika bat da. Gehiegizko energia askatzeko ere erabiltzen da eta baliabide ona da baita ere agresibitate-arazoak dituzten txikientzat. Horixe dio Jennifer Delgado profesionalak.

Jarraitu beharreko pausuak

  • Azaldu haurrei teknika. Igelaren teknika aplikatu aurretik, eman azalpenak umeari. Garrantzitsua da haurrak ez sentitzea behartuta teknika aplikatzera, zigor gisa hartuko baitute, eta erlaxatzen ikasi beharrean, litekeena da azkenean zapuztea. Adibidez, hau esan diezaiokezu: “Goazen orain igel bat izatera eta haiek egiten duten bezala geldi egon behar duzu. Nik gidatuko zaitut eta amaitzean lasaiago sentituko zara. Probatu nahi duzu?”.
  • Eskatu igelaren jarrera imitatzeko. Hasteko, eskatu haurrei igel baten jarrera imitatzeko. Horretarako, ahal dela, lurrean eseri behar dute, bizkarra zuzen, besoak gorputzaren bi aldeetan eta hankak gorputzaren aurrean gurutzatuta. Horrela, jarrera erosoa hartuko dute eta errazago kontzentratuko dira ariketan. Gainera, arnasteko gaitasuna hobetuko dute. Ariketari entretenimendu pixka bat gehitzeko, laku polit batean daudela pentsa dezatela eska diezaiekezu umeei, eta landaredia eta inguruneko xehetasun batzuk deskriba ditzakete, tokia errazago birsortzeko.
  • Gonbidatu euren gorputzaz kontziente izatera. Haurrak eroso jartzen direnean, eska iezaiezu posizio horretan geldi egoteko, igel batek egingo lukeen bezala. Asmoa da txikiek arreta oraingo unera bideratzea eta ingurunearen etenaldi guztietatik aldentzeko gai izatea. Hau esan diezaiekezu: “Airea sentitzen duzue azalean? Jabetzen al zarete arnasketaz? Ohartuko al zarete zure oinen azpian dagoen zoruaz?”.
  • Arnasa igel batek bezala hartzera bultza itzazu. Haurrak kontzentratzen hasten direnean, eskatu arnasa hartzeko, igel bat izango balira bezala. Gonbida itzazu sudurretik airea astiro hartzera, sabela puzten duten bitartean, eta poliki aska dezatela ahotik, husten den bitartean. Arnasketan kontzentratzen laguntzeko, eska iezaiezu eskuak sabelaren gainean jar ditzatela, triparen mugimenduak senti ditzaten.
  • Jabetu emozioez. Haurrak erlaxatzen hasten direnean, emozioetan jarri arreta. Eskatu iezaiezu une horretan sentitzen ari direnari buruzko gogoetak; emozio positiboak ala negatiboak dituzte? Negatiboak badira, gonbida itzazu joaten uztera, arnasketan eta sabelaren mugimenduan zentratuta jarraitzen duten bitartean. Igel-teknikaren alternatiba ludiko bat haurrei lasai-lasai eseri beharrean, igel bat bezala salto egiteko eskatzea da. Salto batzuk egin ondoren, gelditzeko, arnasa sakon hartzeko eta sentsazioetan kontzentratzeko eskatu.