Badira bi aste Katalunian erabakia hartu dutela; mutilek ere izango dute papilomaren txertoa jartzeko aukera. Gainerako autonomia elkarteak ere gaia aztertzen ari dira, tartean EAE zein Nafarroa. Gaur gaurkoz 11-12 urte arteko neskei jartzen zaie txerto hori; gehien-gehienetan LH6 mailan.

Gaia aztergai izan zuten Euskadi Irratiko Osasun Etxea saioan eta Felix Zubia medikuak azaldu zuen zer den papiloma eta zertan eragiten duen txertoak.

“Papiloma birus bat da sexu-harremanen bidez zabaltzen dena, eta lotura zuzena du umetokiaren lepoko minbiziarekin. Emakumeen umetokian bi zati ditu bat barnealdekoa eta bestea kanpokoa edo lepoa. bi minbizi mota ezberdin sortzen dira; barrukoak ez du zerikusirik papiloma birusarekin, baina lepokoak bai”, azaldu zuen.

Azpimarratu zuen papilomaren birusa sexu-harremanen bidez transmititzen dela. “Lepoan lesioak sortzen ditu. Lehenik eta behin, lesioak erdizkakoak izaten dira; hau da, erabat txarrak izan bitartean ikusi litezke eta horregatik gomendatzen da tarteka-tarteka ginekologoarengana joatea eta lesio hauek aztertzea. Gero lesio erdizkako hauetatik minbizia sortzen da, eta ikusi da txerto hau emateak –sexu-harremanak hasi baino lehen– minbizia izateko arriskua asko murrizten duela”.

Birus hau dute bai emakumezkoek eta bai gizonezkoek. “Neskei ematen zaie txertoa beraiek garatzen dutelako minbizia. Zein da orduan mutilei emateko arrazoia? Mutilek transmititu egin dezakete, beraz transmisioa etetea da helburua”.

Ikerketa egin dira

Zubiak azaldu du hainbat ikerketa egin direla gaiaren inguruan eta biztanleria zabaletan. Esaterako, Australian, baina beste herrialde batzuetan ere bai. “Aztertu da neskei bakarrik eman edo mutilei eta neskei eman. Ondorioa da emakumeetan ematen den murrizketa handiagoa dela biak txertatzen direnean. Beraz, badirudi denentzat dela onura mutilak eta neskak txertatzea”.

Zubiak esan du txertoak ez duela albo-ondorio berezirik. “Urteak dira txertaketa nesketan hasi dela. Eraginkortasuna frogatu du, eta mutiletan emanda handiagoa izango luke”.