Gaurkoan, amorruarekin zer egin dezakegun jakiteko ipuin proposamena egiten dizuegu: Miriam Trenado eta Joan Tururen, Sumendi bat daukat.

2 urtetik aurrerako umeendako eta nagusiendako ere lagungarria izan daiteke jakiteko zer egin batzuetan barruan sortzen zaigun sumendia bezala eztanda egiten duen amorruarekin.

Hauxe da sinopsia: “Albak ez zekien, baina sumendi bat du barruan, zilborraren eta saihetsen artean. Batzuetan, sumendia piztu eta lehertu egiten da. Orduan, suak dena erretzen du eta Albak sufritu egiten du, baita beldurtu ere, dena batera. Gau batean, ordea, maitagarri txiki batek azalduko dio zer egin dezakeen haserretzen denean, ustekabeko sentsazioak aurkitzen lagunduko dion trikimailu bat”.

Familiarentzat hainbat aholku ere jasotzen ditu ipuinak. Bertan diote, esaterako, emozio guztiak direla onargarriak, baita gorputzean sentsazio desatsegina sor ditzaketen amorrua, beldurra edota tristura ere.

Gaineratzen dute, amorruak umeak gainditu ditzakeela, eta energia hori ezagutzen eta bideratzen lagundu behar zaiela. Esaterako, modu kontziente batean arnastea “oso tresna erabilgarria” izango dela diote.