Berriki jakin dugu Donostiako Peñaflorida ikastetxean esperimentu bat egin duela Telmo Lazkano irakasleak. DBH4ko ikasleekin landutako proiektu baten bitartez, aste oso bat sakelekorik gabe egon dira ikasleak. Horixe jakinarazi du egunotan Eitb-k eta gaineratu zuten hasieran “antsietatea, lo egin ezina edo haserrea” sentitzen bazuten ere, prozesu “askatzailea” izan dela azkenean.

Bada, Pantallas Amigas-ek egunotan ekarri du bere webgunera Ingalaterrako Bath unibertsitateak egin duen ikerketa baten berri. Ikerketa horretan frogatu ahal izan dute zazpi egun soilik sare sozialetatik deskonektatzeak, antsietate eta depresio-mailak hobetzen laguntzen duela, eta orokorrean gogo-aldartea hobetzen duela.

Ikertzaileek ongizate mentalaren adierazle batzuk neurtu zituzten, hala nola, depresioa eta antsietatea, eta sare horietan jarduera eten eta astebetera birebaluatu zituzten. Atsedenaldia hartu zutenek diote hobekuntza nabarmenak izan zituztela “ongizatean, depresioan eta antsietatean”, sare sozialak erabiltzen jarraitu zutenekin alderatuta, eta horrek epe laburrerako onura iradokitzen duela gaineratu dute.

Jakinekoa da gazte askorendako sare sozialak bizitzaren parte direla dagoeneko, baina Pantallas Amigas-etik beste behin ohartarazi dute sare sozialetatik pixka bat deskonektatzeak onurak dakartzala.