Udako oporraldira begira, Biblioporrak gida berria atera du Arrasateko Bibliotekak, Aretxabaletako, Aramaioko, Oñatiko, Bergarako, Eskoriatzako eta Legazpiko udal liburutegiekin elkarlanean. Urtero argitaratzen den gida honen hogeita zortzigarren edizioa da hau. 

Liburuak, CDak eta filmak gomendatzen dituzte bertan eta gaurkoan hona ekarri nahi izan dugu 0 urtetik aurrerako umeendako egiten dituzten euskarazko ipuinen gomendioak.

Ondorengo hiru ipuinak proposatu dituzte aurten.

‘Xirimiri’ ipuina

Fernando Perez idazlearena da ipuina, Pamielak argitaratuta. Horrela laburtzen dute: “Xirimiri istorio biribil, sinpatiko eta sinplea da. Proposamen erakargarria, musikaltasunez beteriko istorioa bokalekin ohitzeko, eta gainera, eskuzabaltasuna eta familiaren maitasuna bezalako balioak transmititzen dituena. Liburu ezin hobea ozen irakurtzeko eta umeekin irakurketa (eta barreak) partekatzeko”.

Bi ahizpa=Two sisters

Leticia Ruiternándezena da, A fin de cuentos argitaletxeak publikatutakoa. Horrela laburbiltzen dute: “Bi ahizpa elkarri begira, jolasean eta barrez. Begirada gorputzera zuzentzen da: besoak, belarriak, sudurra, bihotza. Poesia delikatu batean haurtzaroko erritmo geldoa, denboraren iragate gozoa transmititzen digun neurri txikiko liburu ilustratua, euskarazko eta ingelesezko edizio elebiduna”.

Baso ilun eta sakonean

Delphine Bournay da idazlea, Txalaparta argitaletxearena. Honela laburtzen dute: ” Basoan, ilundu baino lehentxoago, otso familia ugariaren orroak entzuten dira. Ez izutu gu bezalakoak dira, lo hartu aurretik istorio bat behar dute, musu bat, abesti bat. Otsoek tradizio literarioan duten lotura negatiboa deseraikitzen duen albuma”.

Zein ipuin aukeratuko duzu?