Udako oporraldira begira, Biblioporrak gida berria atera du Arrasateko Bibliotekak, Aretxabaletako, Aramaioko, Oñatiko, Bergarako, Eskoriatzako eta Legazpiko udal liburutegiekin elkarlanean. Urtero argitaratzen den gida honen hogeita zortzigarren edizioa da hau. 

Aurreko batean etxeko txikienendako euskarazko gomendioak ekarri genituen hona, eta gaurkoan sei urtetik aurrerakoendako jaso dituztenak erakutsi nahi izan dizkizuegu.

‘Barruko hotsak‘

Leire Bilbao idazleak Pamiela argitaletxearekin argitaratutakoa da Barruko hotsak liburua. Horrela laburtzen dute: “Egun arrunt batean egiten ditugun hots eta soinuak batu ditu Leire Bilbaok liburu jolasti honetan. Eta Maite Mutuberriaren elkarlanarekin, soinuak poema bilakatu ditu”.

‘Giza animaliak gara‘

Alberdania argitaletxearekin argitaratu du Rosie Hainek. Honela laburtzen dute: “Antzina, urtaroek egutegia gidatzen zuten, pertsona bakoitza artisaua zen, janaria bilketa edo ehizaren bitartez lortzen zen, animaliak errespetatzen ziren, batzuk adiskide leialak, beste batzuk elikatzeko erabiliak… Giza eboluzioari buruzko gogoeta poetiko baten aurrean aurkitzen gara, non egileak historiaurretik XXI, mendera arteko gizakiak izan duen papera kontatzen digun”.

‘Aitona Lukasen txabola’

Pello Añorgak, Elkar argitaletxearekin argitaratutakoa. Honela laburtzen dute: “Baserria eraitsi zutenez geroztik, aitona txabolan bizi da, eta ez da beste inora joaten. Krispin biloba gonbidatu du gaurkoan. Hark pozik hartu du gonbidapena, izan ere, aitonak ez du inoiz presarik izaten, eta berarekin egoteko behar duen denbora hartzen du. Añorgak keinu bat egin die bizimodu xumeari eta aitona-amonen jakinduriari”.