Udako oporraldira begira, Biblioporrak gida atera du Arrasateko Bibliotekak, Aretxabaletako, Aramaioko, Oñatiko, Bergarako, Eskoriatzako eta Legazpiko udal liburutegiekin elkarlanean. Urtero argitaratzen den gida honen hogeita zortzigarren edizioa da hau. 

Oraingo honetan, bederatzi urtetik aurrerakoendako egin dituzten euskarazko liburuen proposamenak zerrendatuko dizkizuegu.

‘Gerra’

Jose Jorge Letriarena da, A fin de cuentos argitaletxearekin argitaratutakoa. Honela laburtzen dute: “Gerrak eguna urratzen du, gaixotasun xuxurlatu eta bizkor batek bezalo ez du entzuten, ez ikusten, ez sentitzen. Gerra gorrotoak, zapaldu nahiak eta ezinikusiak elikatzen dute. Labur baina indartsu, gerraren gaitz guztiak agerian jartzen dituen albuma”.

‘Esna irauteko ipuinak’

Xabier Olasorena da, Denonartean argitaletxearekin publikatutakoa. Honela deskribatzen dute: “57 ipuin laburrez eta beste hainbeste esaldi motzez osatutako liburu hau egiteko, Olasok umorea, tradizioa gaur egunera ekarrita eta irakurleekin kolastea erabili ditu. Irakurleak ahozkotasunari lotutako idazkera nabarituko du. Testuari freskotasuna eta arintasuna ematen diona”.

‘Botoitxo’

Anjel Lertxundirena da, Erein argitaletxearekin argitaratutakoa. Horrela laburtzen dute: “Bere herriko mertzerian sartzen den bakoitzean liluratuta sentitzen den mutiko baten istorioa da hau. Bertan ohartuko da bizitzan koloretako zinta ederrak daudela, baina baita galera eta tristura ere. Lertxundi maisu da emozio indar handiko literatura eskaintzen eta Olariagaren marrazkiek ere primeran islatzen dute indar hori”.