Oporretara goazenean, zenbat gauza daramatzagun kontuan izaten dugu, espazio kontuagatik batez ere. Haurrekin behar bada are gehiago. Baina, beharrezkoa izango da botikin bat eramatea, horixe azpimarratu digu Leire Azpiazu erizainak.

Eta hau gaineratu du: “Haurrak medikazioren bat hartzen badu, medikazio hori eramatea ezinbestekoa izango da. Gainera, ohikoa den analgesikoa eramatea ere ondo legoke eta haurraren osasun txartela ere beharrezkoa izango da. Udan, eguzkitatik babesteko krema ere hartu beharko dugu”.

Horrez gain, ez dira gauza askoz gehiago eraman beharko, Azpiazuk dio berak beste hiru gauza hartuko lituzkeela: termometroa, apositoak (tiritak) eta gasak zauriak garbitzeko. Bidaiatzeko nahikoa izango dugu horrekin.

Dena den, gogorarazi nahi izan du prebentzioa dela oinarri nagusia.