Errua… zuentzat. Basurtuko gertakarien harira…

Kezka eta amorruak zeharkatu nau gaur goizean Basurtun gertatu dena irakurri dudanean. Ezin izan dut ekidin lehen erditze ostearen zuloan nengoela Donostiako Ospitalean antzeko gertakari bat eman zenean sentitu nuen beldurraz. Ezin imajinatu familia horien mina. Doakiela besarkada handi bat haurra eramateko saiakerak egin dituen beste familiei eta bstez ere, euren haurraren desagertzea bizi izan dutenei. 

Sistemak huts egin du. Ziurrenik ez dugu inoiz jakingo baliabide pertsonalen egiturazko gabezia izan den, segurtasun protokoloaren hutsunea izan den edo zer gertatu den benetan… baina sistemak huts egin du. Osasuna bermatzeaz gain “bikaintasunaz” hitz egiten duen sistemak segurtasuna bermatzeko derrigortasuna du. 

Ez da aukerarik egon behar edonork, edozein paziente bertatik ateratzeko. Eta noski, hau ez da konpontzen segurtasun pribatuko langileak areagotuz. Hausnarketa sakona eta baliabideak behar dira. 
Haserrea areagotu zait sare sozialetan eta prentsan behin eta berriro ikusi ditudan mezuekin: “familiak jakin behar du probak gelan eta familiaren presentzian egiten direla”. 
Ez horixe! Familiak ez du INOLAKO ardurarik. Ezjakintzat jotzera heldu denik ere ikusi dut… 
Familiak konfidantzaz jokatu du osasun zentro batean osasun profesionaltzat aurkeztu den pertsona batekin. Ez al da hori behin eta berriro eskatzen zaiguna?  
Benetan gure osasun zentroetan INOIZ ez da haurrik banatzen euren gurasoengandik? Protokoloz, maiz. Horixe salatzen dute familiek oso maiz. Osasun frogak egiteko haurra lasaiago egongo denaren aitzakian, ebakuntzen aurretik haurra lokartu aurretik (ikus Gorka Saituaren azken adierazpenak eta bizipena)… egunero banatzen dira haurrak askotariko egoeratan eta kexatzen garen gurasoek jasotzen ditugun erantzunak iraingarriak dira. 
Beraz ez, ez ausartu familiaren jokaera zalantzan jartzen. Ez dute inolako ardurarik. 

Ekintzaz beraz, atzean egon daitezkeen arrazoiez etabar… osasun mentala zentroan jartzen dugunean hitz egin ahal izango dugu.
Bitartean, bihotzez espero dut familia zalantzan zuzenean edo zeharka jarri dutenek hausnarketa egin eta barkamena eskatzea. Eta batez ere, sistema izan dadila gai, sortu diren zauri sakon horiek tratatzeko bide egokiak eskaintzen.

Argazkia: By Fernando Pascullo – Norberak egina, CC BY 3.0,