Urte amaiera datorkigu eta horrekin batera ohikoak diren urte berrirako asmo berriak.

Bada, oraingoan antzekoa baina beste ikuspegi batetik egiteko proposamenarekin natorkizu.

Ez dezagun beteko ote diren ez dakigun espektatibarik sortu eta amaiera edo itxiera eman diezaiogun dagoeneko bizi izan dugunari.

Urtebetean gauza asko egiten ditugu, hamaika pasadizo bizi egiten ditugu. Onak eta ez hain onak.

Horiek guztiek egiten gaituzte, unean unean, garenak. Eta kontzientzia osoan bizi nahi badugu, jarri diezaiegun arreta eta eskaini diezaiegun merezi duten atentzioa.

Beraz, urte amaiera bizitzan garrantzitsuak diren lau lan egiteko aprobetxatu ditzagun:

Barkamena eskatu, gaizki egin ditugun edo hartu dizkiguten gauzengatik. Bihotzez eskatu dezagun eta ez bakarrik bestearen barkamena jasotzeko, baizik eta geuk ikasteko eta geure burua ere barkatzeko.

Barkamena eman, min eman digutenei. Uler dezagun gurekin horrela jokatu badute, beraiengan zerbait ongi ez doalako izango dela seguraski.

Honek ez du esan nahi aurreko harremana berreskuratuko dugunik, lagun izatera itzuliko garenik… baina bai besteekiko zein gurekiko lasaiago sentitzen lagunduko digula.

Eskerrak eman, jendeari, bizi izandakoari, bizitzari… baloratu dezagun dau(z)kaguna(k) eta lortu duguna.

“Maite zaitut” esan. Lotsarik gabe, barnetik sortzen zaigun bakoitzean.

Eta gomendio berdinak seme-alabekiko balio du, baina kasu horretan, egunero edo ia egunero egitearena da proposamena, harremana positiboa izaten lagunduko duelakoan.

Lau betekizun horiek aurrera eramanda, urte osoko ziklo bati itxiera emango diogu eta geure motxila piska bat arinduko zaigu urte berriari ongi etorria emateko.

Eta heriotza datorkigunean, itxi gabeko ziklo gutxi izango ditugu eta amaiera lasaiagoa izango zaigu.

Ez da betebehar erraza baina saiatzera gonbidatzen zaituztet.

Nire aldetik, hilabete hauetako isiltasunagatik barkamena eskatzea. Bizitzari eskerrak eman erretiro honen arrazoiarengatik eta zuei hor jarraitzeagatik. Maite dut zuekin tartetxo hauek konpartitzeko aukera eta neurri horretan, banaka ezagutu ez arren, zuek maite zaituztet.

Urte amaiera goxoa opa dizuet eta besarkada bana aurten mahaira eseriko ez zaizkigunongatik.