4-13 urte bitarteko zazpi gaztetxo dira eta gaur gaurkoz Diputazioaren harrera-etxeetan bizi dira. Senide biologikoekin lotura galde barik, familia baten berotasuna behar dute, eta harrera hori egiteko gertu dauden familien bila deialdia egin du Diputazioak.

Diputazioko Familia Harrera eta Adopzioko atalburu Jose Mari Lezana eta harrera-ama da Lorea Kortabarria arrasatearra. Programaren inguruko xehetasunak eman ditu Lezanak, eta bere esperientziaren berri eman du Kortabarriak.

Hain zuzen ere, lau bat urte dira Naroa alaba Kortabarriaren familiara heldu zela. Inoiz hartu duen erabakirik onena izan dela azaldu du arrasatearrak, eta gizartean nagusi diren hainbat uste oker gezurtatu ditu.

Gipuzkoako Foru Aldundiak kudeatzen du harrera-familien programa, eta jakinarazi badute ere une honetan lurraldean 73 adingabe daudela familia baten zain, zazpi neska-mutikoren kasua bereziki premiazkoa dela azaldu dute.

Gipuzkoako harrera-programak 33 urte bete ditu, eta une honetan 403 haur eta gazte bizi dira 350 harrera-familietan.

Familia interesatuek hainbat bide dituzte harrera-programaren arduradunengana heltzeko: familiaharrera@gipuzkoa.eus edo 943 11 25 22.