Ekoetxea ingurumen-hezkuntzako zentroen sarea da eta IHOBEk kudeatzen du. Gaur egun, Urdaibain, Meatzaldean, Txingudin eta Azpeitian ditu zentroak proiektu honek eta urtero 120.000 pertsonatik gora jasotzen dituzte. Natura eta biodibertsitatearekin lotutako jarduera eta proposamenak antolatzen dituzte, eta asteburuan ere bada zertan parte hartu. Ekintzetan parte hartzeko izena eman behar da webgunearen bidez.

Urdaibaiko jarduerak

Urtarrilaren 14rako, zenbait jarduera antolatu dituzte. Familian hiri-baratze bat landatzeko aukera izango dute 4 urtetik gorako haurrek eta familiek. Bi txandatan antolatu dute landaketa, 10:30ean eta 12:00etan. Hiru euro ordaindu beharko dira ekintzan parte hartu ahal izateko.

Goizeko hamaiketatik aurrera, halaber, Lumakelak Mundakan. Itsasoaren historia saioa antolatu du. Mundakako kostaldeko udalerriak sekretu eta bitxikeria asko ezkutatzen ditu, baina horien guztien artean lekuaren berezko arroka batzuk nabarmentzen dira. Sei urtetik gorakoentzat zuzenduta dago eta aforoa mugatua da: 25 pertsona. Hiru euro ordaindu beharko da pertsonako.

Arratsaldeko bostetan, aldiz, ordu eta erdiko Klima aldaketaren escape boxa jokoa antolatu dute doan. 60 minutu izango dituzte partehartzaileek klima aldaketaren aurka egin dezaketena zer den deskubritzeko. Pagadi-baso baten bihotzean dagoen laborategi klandestino batean kokatzen da jarduera hau.

Urtarrilaren 15ean, berriz, talo tailerra eta dastaketa antolatu dute familientzat. 30 minutuko tailerrak izango dira eta hiru euro ordaindu beharko dira. Txandak hauek dira: 11:30, 12:30, 13:00, 13:30 eta 14:00.

Arratsaldean, Cosmium Planetario 360ยบ mugikorra jarriko dute kosmosaren mirariak ezagutu eta ulertzeko. Kupula osoa ikusten da eta sentsazio inguratzailea du, izarren argiaren azpian. Hiru txandatan egin ahal izango da: 16:00etan, 16:45ean eta 17:30ean.

Meatzaldeko jarduerak

Urtarrilaren 14an, goizeko hamaiketan, harriekin jolas tradizionalak egin ahal izango dituzte etxeko txikiek; hala nola, hirukoa marran edota dominoa.

Hurrengo egunean, bi orduko Zoruak ezkutatzen duena tailerra egingo dute, hamabietan ekinda. Hainbat esperimentu egingo dituzte lurraren garrantzia, fauna eta eskaintzen dituen baliabide guztiak ezagutzeko.

Txingudiko jarduerak

Urtarrilaren 14an, 90 minutu inguruko bisita gidatua egingo dute goizeko hamarretatik aurrera Plaiaundiko naturagunean zehar, padurako balio naturalak, historikoak eta ekologikoak erakusteko.

Hegazti bereziak izeneko ginkanarekin emango diote hasiera igande goizari hamaiketan. Pista- eta proba-joko dibertigarriak jarriko dituzte Ekoetxearen eta Txingudiko paduretako hegazti berezienekin lotuta, naturagunea zehar ibilita argituko dituzte pistak.

Azpeitiko jarduerak

Jarduera bakarra egingo dute asteburuan Azpeitian, eta berau igandean izango da goizeko hamaiketan. Tailerra egingo dute eta artoaren historia eta erabilerak ezagutzeaz gain, taloak egingo ditugu arto-irinarekin eta ur epelarekin, ondoren etxean prestatu eta dastatzeko.