Donostiako ikastetxe publiko bateko Amak contra el racismo ama-taldeak Arraza-aurreiritziek haurrengan dituzten ondorioak sentsibilizazio kanpaina jarri du martxan. Kenneth eta Mammie Clark-ek AEBetan egindako esperimentuaren erreplika bat egin dute. Ikerketak haurren jatorri etnikoari lotutako estereotipoak eta autopertzepzioa azaleratu nahi zituen. Horretarako, bi panpin –zuria eta beltza– erabili dituzte eta zenbait adingaberi galdera orokor batzuk egin dizkiete. Hala nola, “zein da zintzoena?”, “zein da panpin gaiztoena?”, “zein da azkarrena?”, “zein da gezurtiena?” edota “zein panpinek ematen dizu beldur gehien?”.

Ama-talde honen esanetan, “diskriminazioa eragiten duten indarreko aurreiritzi eta estereotipoei buruzko hausnarketa bilatzen du; sentsibilizazio kanpaina bat euskal gizarteko eragile guztientzat”.

Era berean, gaiaren “konplexutasuna” dela eta, parte hartzen duten haurrenganako errespetu osoa eskatu dute, “ez baitira kasu isolatuak, gure gizartearen isla baizik. Izan ere, aurreiritziak eta estereotipoak sozialki eta kulturalki eraikitzen dira, eguneroko elkarrizketetan, erakundeetan, filmetan, ipuinetan, hedabideetan, publizitatean, sareetan, jostailuetan, arropetan, etab.”.

Esperimentua hurrengo bideoan ikus daiteke oso-osorik: