Gaur bertan argitaratu dugun albistearen eta bertan azaltzen den bideoaren inguruan bere iritzia azaldu nahi izan du Eli Dominguez, guraso.eus eko erabiltzaile eta kulturaratekotasuna sustatzeko gaietan lanean dabilen guraso denak.

Asteazkenean lagun baten bitartez jaso nuen Donostian “Amak contra el racismo” ama-taldeak sortutako arraza-aurreiritzien inguruko bideoa.
Senar senegaldar eta seme-alaba arrazalizatuak dituen ama txuri bezala, lehen ikustaldian, tristura sentsazio galanta sentitu nuen. Aurretik eredu berdina duten hainbat bideo ikusita nituen, baina euskaraz ari ziren haurrak izatean inpaktua handiagoa izan zen.

Bideoa hainbat aldiz ikusi eta lagun batzuekin partekatu ostean, bideoa besterik gabe zabaltzea egokia ez zela ondorioztatu nuen. Bideoan estereotipoak antzemateko erabiltzen den metodoa oso zurruna iruditzen zait, planteatuta dagoen eran, haurren erantzun hori lortzea erreza da. Bestetik, bideo amaieran azaltzen dutenez, gehiengoaren erantzunak azaleratu dituzte. Zergatik ez beste zerbait adierazi dutenena ere? Bestalde, bideoan agertzen den haur beltza bakarrari, besteei ez bezala, gazteleraz zuzentzen zaio galderak egiten dituen emakumea, beste haurrekiko desberdintasuna ezarriz.

Ez daukat zalantzarik bideoa asmo onenarekin egin dela. “Amak contra el racismo”-koekin nere iritzia partekatu ondoren, jakin izan dut testuinguru eta lanketa baten barne kokatu duela bideo hau. Dena den, besterik gabe bideo hau zabaltzeari arriskua aurkitzen diot.


Gizartearen gehiengoak ez du denborarik honi buruz hausnartzeko, ezta norekin hausnartu ere. Ondorioz, estereotipo horiek apurtu baino indartu egiten ditu. Estereotipo horiek apurtzeko eredu desberdinak aurkeztea aberasgarriagoa iruditzen zait. Dena den, benetan horrekin apurtzeko, bizi garen arrazakerian oinarritutako sistema apurtu beharko litzateke, beraz fokua haurren aurreiritzietan jarri beharrean, indarrak batu eta sistema aldatzean jarri beharko genuke.