Euskaltzaleen Topagunearen gidaritzapean, Euskal Herriko ia 80 herritan egingo da ekimena urriaren 29ra arte, eta helburuetako bat da haurrekin harreman zuzena duten helduek beraien hizkuntza praktiken inguruan hausnartu eta euskara gehiago erabiltzea.

Irati Iciar Euskaltzaleen Topaguneko lehendakariak azaldu duenez, haurrak aipatu eta hartzen dira kontuan, baina begirada zabalagoa izan behar da: “Zuzen-zuzenean helduak protagonista bihurtzen ditu ekimen honek. Izan ere, helduok gara ume horien erreferente eta eredu, eta helduongatik jasotzen dituzte egiteko eta esateko modu asko”.

Hain justu, atzo egin zuten agerraldia Donostiako San Telmo museoan ekimenaren bigarren edizioaren berritasunen berri emateko, eta Iciarrekin batera izan ziren Jon Zapata ekimeneko koordinatzailea eta Topaguneko kidea, eta Mikel Astarloza eta Nerea Alias gurasoak. Are gehiago, han izan ziren Eusko Jaurlaritzako eta Nafarroako Gobernuko ordezkariak zein herrietakoak ere.

Euskaltzaleen Topaguneak koordinatutako ekimena izan arren, Euskal Herriko ia 80 herri eta auzok hartuko baitute parte gaur hasi eta urriaren 29ra arteko ekimenean. Bi helburu izango dituzte aurten: batetik, helduen arteko hizkuntza portaeretan eragitea; eta, bestetik euskararen erabilera areagotzeko aktibatzea. “Topagunean oso argi daukagu euskararen biziberritze prozesua gizarte osoa ukitzen duen prozesu bat dela”, nabarmendu du Iciarrek, azpimarratuta guztiek dutela erantzukizuna eta beharrezkoa dela herritar denen babesa eta bultzada. “Baina bereziki, beharrezkoak dira, aktiboki euskararen aldeko pausoak emango dituzten eta ematen dituzten norbanakoak”.

Dinamikak martxan

Haurren Aurrean Helduok Heldu umeekin harreman zuzena duten helduei zuzenduta dago, eta ahalik eta parte hartze handiena sustatzeko, “proposamen egingarri eta ulerterraza” plazaratu nahi izan du Topaguneak. Era horretan, helduen sentsibilizazioan, ahalduntzean eta saretzean eragin nahi du, esate baterako, tailerrak eta hitzaldiak antolatuta. Bergaran, esate baterako, hainbat jarduera egingo dituzte. “Ekintzek beraiek egiten diguten ekarpenaz gain, gune babestuak sortzea da ideia: euskaraz lasai aritzeko guneak”, esan du Zapatak.

Elgetan ere, bai. Urriaren 26rako familia giroan poste-posteka baloi jokoan aritzeko deialdia egin dute. 16:30ean hasiko dira.

Euskaraldian sustatzen diren portaerak sozializatzen jarraitu nahi du Topaguneak, portaera linguistiko horiek herritarren egunerokoan integratzeko ahalegina egitea. “Euskaldunok euskaldunokin euskaraz egiten dugu arau soziala indartu nahi dugu: solaskideek, euskara dakiten kasuetan, euskaraz egiten; lehen hitzak euskaraz egiten eta kideak ulertu bai, baina euskaraz hitz egiten ez badu euskarari eusten, elkarrizketa elebidunei bide emanez”, azaldu du koordinatzaileak.

Parte hartzeko deia

16 urtetik gorako helduei zuzenduta dago ekimena, baina batik bat 0 eta 12 urte bitarteko haurren gurasoei edo zaintzaileei. Hori gogoan izanik, euren bizipenen berri eman dute Astarlozak eta Aliasek, umeengan duten eraginarengatik gurasoek euskararen alorrean egin dezaketen ekarpena azpimarratuta. Hala, ekimenean parte hartzeko deia egin diete haurrek etorkizunean euskaraz “eroso eta naturaltasunez” aritzea nahi duten gurasoei.