Ekoetxea ingurumen-hezkuntzako zentroen sarea da eta IHOBEk kudeatzen du. Gaur egun, Urdaibain, Meatzaldean, Txingudin eta Azpeitian ditu zentroak proiektuak eta urtero 120.000 pertsonatik gora jasotzen dituztela adierazi dute. Natura eta biodibertsitatearekin lotutako jarduera eta proposamenak antolatzen dituzte, eta asteburuan ere bada zertan parte hartu. Ekintzetan parte hartzeko izena eman behar da webgunearen bidez.

Aste Santurako ez ezik Pazko Asterako ere antolatu ditu haur eta familiendako planak Ekoetxeak. Datozen egunetan, Txingudiko eta Urdaibaiko egoitzetan egongo da zertaz gozatu.

Plaiaundiko aldaketa

Plaiaundi Euskadiko marearteko hezegune garrantzitsuenetako bat da, eta Txingudiko Ekoetxeak antolatutako txangoarekin bertako altxor naturalak, historikoak eta ekologikoak ezagutzeko aukera egongo da apirilaren 6an. Besteak beste, bisitaren bidedz ikasi eta behatuko da Plaiaundiko paduran bizi den biodibertsitate aberatsa eta ekosistemarako duen garrantzia, giza jarduerak historian zehar ingurune horretan izan duen eragina, padurak klima-aldaketan duen eragin erregulatzailea, barruko aintziretara eta marearteko hondartzara bisita nahiz espazio horien kalteberatasunari eta babesteko moduari buruzko hausnarketa.

Pertsona helduei zuzendutakoa da eta zapatuan, hilak 6, 10:00-11:30 bitartean izango da. Prezioa: bi euro. Izena emateko galdetegia bete behar da.

Atxarreko behatokia

Urdaibai Biosfera Erreserbako ikuspegi panoramikoaz gozatzeko aukera egongo da apirilaren 6an Urdaibaiko Ekoetxeari esker. Artadi kantauriar ederra zeharkatu ondoren, Urdaibai Biosfera Erreserbako ikuspegi ederrenetakoa duen Atxarreko San Pedro ermitara egingo dute ibilaldia. Ibilbidean zehar deskubrituko dute artadia habitat garrantzitsua dela florarentzat eta hegazti, ugaztun, narrasti eta intsektu espezie askorentzat. Ekosistema hori funtsezkoa da uraren zikloa erregulatzeko ere. Begiratokira iristean, paisaia eta kolore mosaiko ikusgarria ikusiko dituzte bertaratutakoek. Ekosistema hauskorrak, baina eguneroko ohiturak aldatuz kontserbatzen lagun dezakegunak.

Akordako aparkalekuan elkartuko dira apirilaren 6an 11:00etan eta 13:00 arte iraungo du. Familiei (6 urtetik gora) zuzendutako ekintza da eta bi euro balio du pertosnako. Izena emateko galdetegia bete behar da.

Urdaibaiko produktuak: kozinatu familian KM0 produktuekin

Apirilaren 7an, Urdaibaiko Ekoetxean Ortutik ahora-ren eskutik bertako ekoizleen produktuak erabiltzen ikasiko dute, zaporez betetako jakiak prestatzeko. Modu horretan, jasangarritasuna elikaduraren ardatz bilakatuko dute.

Familiei (6 urtetik gora) zuzendutako ekintza da eta 17:00etatik 18:30era izango da. Prezioa bi euro da. Izena emateko galdetegia bete behar da.