Sonia Lopez aditua gurasoentzako formazioetan eta MalasMadres egitasmoan idazten du. Bere azken kolaborazioan nerabezaroa eta gurasotasunaz idatzi zuen. Guk guraso.eus egitasmora ekarri dugu bere hausnarketa.

Ez dago guraso perfekturik duen neraberik

Nerabe batekin bizitzea oso lan zaila eta erronka handia da. Bizitzako etapa hau lasaitasunez eta enpatiaz laguntzea ia ezinezkoa da.


Seme-alaba nerabeak ditugun familiak tentsio eta eztabaida ia etengabeen artean bizi gara. Gatazka horiek ezinegon handia sortzen dute etxean, eta frustrazio eta erru handiz betetzen gaituzte. Gure seme-alaben hezkuntzan orain arte ereindako guztiak fruiturik eman ez duela sentiarazten diguten liskarrak dira. Gaizki edo arau malguegiekin hezi ditugula sentitzen dugu.
Zein zaila den entzuteko inolako interesik ez duen gazte bat ulertzea, silaba babakarrekin erantzuten duena eta bat-bateko umore-aldaketak dituena. Gaizki erantzuten du haserretzen denean, nagikeriaz  erantzuten dio eskatzen diozun ia guztiari, eta bere jokabideen ondorioak axola ez balitzaizkio bezala jokatzen du. Denbora gehiena bere logelan  ematen du eta ez du gertatzen zaiona edo kezkatzen duen hori gurekin partekatzeko interesik erakusten.


Sentitzen dituen aldaketa fisiko, kognitibo, sozial eta emozional guztiak ulertzen saiatzen den nerabea da, eta honek  ziurgabetasuna sortzen dio. Bere erantzukizunak betetzeko, bere hanka sartzeak eta  haserrea kudeatzeko zailtasun handiak erakusten ditu. Bere nortasuna eta independentzia aktiboki arakatu eta bere intentsitate emozionala menderatzen ikasi behar du.


Gure onetik ateratzen gaituen jarrera honek  soka ahul eta fin baten gainean bizi garela sentiarazten digu eta tristura handia sortzen digu guraso moduan. Etapa nahasgarri eta nekagarria da, eta gogorarazten digu ez garela guraso perfektuak, baina dakigun onena egiten saiatzen gara nahiz eta beti sentitzen dugun ez dugula asmatzen.

Garapen-aldi hori ulertzeak gure semearenganako begirada aldatzea eskatuko digu, eta haren premia berriei erantzuteko estrategia berriak garatzea. Onartzea jada ez dugula haur gozo eta maitagarri hura, eskolan egiten zuen guztia etengabe azaltzen zuena, orain gazte isil eta barrura begirakoa  bihurtu delako. Etapa berri bat, non orain arte funtzionatu diguten gauza asko jada ez diren eraginkorrak.


Nerabe batek, berak onartzen ez  badu ere, inoiz baino gehiago sentitu behar du guk onartzen dugula eta den bezala maite dugula, baldintzarik gabe. Ulertzen dugula zein zaila den bere aldaketa intentsua kudeatzea  eta munduan leku bat bilatzea. Ez ditugula eraso pertsonaltzat hartzen tonuz kanpoko erantzunak edo arrazoi nabari gabe  eragindako haserreak.

Nola hobetu dezakegu gure nerabearekiko harremana?


1. Nerabearen garunak nola funtzionatzen duen ulertzeak jarrera desafiatzaile asko eta erantzun txarrak ulertzen lagunduko digu. Eraldaketa-prozesuan dagoen burmuin oldarkorra da, eta horregatik hainbeste kostatzen zaio planifikatzea, emozioak kudeatzea eta neurtzea, arriskuak identifikatzea eta enpatizatzea.


2. Nerabea mimoz eta pazientzia handiz tratatzea izango da harekiko konexioaren gakoa. Entzuna sentitu behar du, bere proiektuekiko interesa erakutsi behar dugu eta etxean bere ideiak, kezkak eta iritziak kontuan hartu behar ditugu. Harenganako espektatiba egokiak ezartzeak sentiaraziko dio den bezala maite dugula.


3. Nerabearekiko komunikazioa errespetuan eta afektuan oinarritu beharko da. Onartu beharko dugu orain gureak ez bezalako ideiak izatea, hainbeste behar duen independentzia eta askatasunerako bidea egitea. Gure elkarrizketetatik sermoiak, galdeketak, konparazioak, balio-epaiak eta gaitzespenak ezabatzea.


4. Gatazken aurrean, berak barruan aurkitzen ez duen lasaitasuna eskaini  beharko diogu nerabeari, errespetu- edo portaera-faltak justifikatu gabe. Haserrera eraman duten arrazoiak ulertzen saiatuz eta sarritan gainezka egiten duten emozioak behar bezala identifikatzen eta kudeatzen lagunduz. Etxean adostutako mugak ezartzeak eta gure desadostasunei guztion artean  konponbideak bilatzeak, iraganeko akatsak aurpegiratu gabe, harekin lotura ona izatea erraztuko digu.
5. Bere konfiantza indartzea, bere buruarengan segurtasuna senti dezan, eta, horrela, bere autoestimua garatzea. Gazte bat seguru sentitzen denean, litekeena da arriskuak modu arduratsuan bere gain hartzea eta agertzen diren arazoak konpontzeko gai izatea. Bere indarguneak ezagutzen eta helburu errealistak eta lorgarriak ezartzen laguntzeak egunero ikasteko eta hobetzeko gogoa indartuko dio.


Gure nerabeak ez du ama eta aita perfektua eduki behar,  eguneroko maitasuna eta laguntza eskaintzen jarraituko dion norbait baizik, akatsak epaitu gabe. Bere bizitzan presente eta eskuragarri egotea eta bere kezka eta ardurekin  enpatizatzea. Anima dezala ausart izatera eta lagun diezaiola ondo sentitzen.


Zure nerabeak ezingo luke ZU baino ama edo aita hoberik izan. Beraz, utzi arrastoa zure begiradekin, zure zainketekin, zure patxadarekin eta baldintzarik gabeko maitasunarekin.