Irungo Parean elkarteak jarri zuen martxan Ipuin ez sexisten gida kolektiboa 2021ean Gipuzkoako Foru Aldundiaren babesarekin. Oso lagungarria izan daiteke berdintasuna, autonomia, dibertsitatea, errespetua eta askatasuna sustatzen duten euskarazko ipuinen bilaketa egiteko. Finean, hezkidetza oinarri duten eta euskaraz idatziak, edo euskarara itzuliak izan diren ipuinak bildu dituzte. Katakrak liburu-denda eta editorialaren laguntza jaso dute.

Proposatutako ipuinen artean hamaika gai aurki daitezke: emakumeek historian egin duten ekarpena ezagutzera ematen duten ipuinak, maskulinitate berriak erakusten dituztenak, genero indarkeriari aurre hartzeko proposamenak, homofobiaren aurkakoak, heziketa afektibo sexuala sustatzeko materialak, autoestimua lantzeko ipuinak, emozioak ezagutzeko lagungarri direnak, familia aniztasuna agertzeko bildumak… Gidan dauden ipuinak gai potoloak lantzeko aukera ematen badute ere, literatura lagun, haur eta umeei erakargarriak diren ipuinak izatea lehenetsi dute.

Liburuak multzo ezberdinetan sailkatu dituzte: lehen urratsak, aurre-irakurleak, irakurleak, jakintzak eta gazteak. “Jakin badakigu liburu gehienak gomendatutako adinen arabera sailkatuak daudela, haatik, adinarekin baina gaitasunekin dago lotuta irakurketa eta beraz, gida honek erritmo ezberdin horiei egin nahi die leku (…) 2020ak utzitako berrikuntza gehienak jasoak daude, baina badira aspaldi idatzitako eta oraindik oso kuttunak diren ipuin eta liburuak. Argitaletxe txikiak eta material zainduak izatea lehenetsi dugu”.

Gida modu kolektiboan osatu daiteke; izan ere, edonork iradoki dezake ipuin ez sexista berri bat webguneko formularioa beteta.