Argitalpena: ‘Osteratxo bat parkean’ (+ 4 urte)

Manu Lopezek itzuli du Anthony Browneren Osteratxo bat parkean. Narrazioak bi istorio paralelo biltzen ditu: goiz batean, Iriarte jauna eta haren alaba Argi, Fernando txakurra hartuta, paseatzera irten ziren parkera. Goiz hartan bertan, Uriarte andrea eta haren seme Pintto, Isabel txakurra hartuta, leku berera joan ziren paseatzera.

Alde batetik, helduen jokabidea erakusten du narrazioak, parkean dauden denboran elkarri jaramonik egiten ez diotela. Haurrek eta txakurrek, berriz, estereotipoetatik salbu, naturaltasunez jokatzen dute. Horra idazlearen mezu argi, edo ez hain argia.

Aipatzekoa da, baita ere, ilustrazioetan agertzen den sinbologia; izan ere, kontakizuna islatzen duten irudiez gain, hainbat elementu berezi txertatzen dira narrazioan.