Eskapu liburuak dira escape room baten parekide idatziak. Hala definitzen eta idazten ditu Nerea Loiola idazleak, zeinak pare bat argitaratuak zituen orain arte, Erein argitaletxearekin. Orain, beste bilduma bat hasi du, Eskaputxiki, Miraren Mendekua liburuarekin. Berezitasuna: zortzi urteko semearen olgetan eta elkarlanean egin du liburua Loiolak. Berarekin hitz egin dugu liburuaz eta berau semearekin idazteko prozesuaz.

“2023ko gabonetan, 8 urteko semeak bere adinekoentzako ESKAPU liburu bat egiteko eskatu zidan. “Ideiaren bat okurritzen bazait egingo dut” [amak]. “Nik badut ideia bat” [haurrak]. Elkarrekin egitea proposatu nion. Oporretan ideia landu genuen (ni olgetan eta bera benetan), eskema egin, pertsonaiak… Urte hasieran gaixoaldi luze samarra izan zuen eta berriz ere heldu genion “jolasari”. Jolasa ez zela ikusi nuen arte, ideia on bat geneukan, liburu bat eta bilduma berri bat.”

Nerea Loiola

Eta hortxe da eskapu liburua: Aukeratu zure abentura, ihes-liburuaren eran. Miraren Mendekua, 8 urtetik aurrerako haurrentzat, Ivan Landaren ilustrazioekin.

Sustatu.eus argitaratutako albistetik ekarri dugu testua.