Geroz eta gehiago dira haurretan irakurzaletasuna bultzatzea helburu duten irakurketa klubak. Bedian, Laudion, Orion, Berrizen, Eibarren… Herri askotan jarri dituzte martxan era honetako egitasmoak, adin ezberdinetako haurrentzako.

Azken astean, esaterako, Oñatin egin dute estreinakoz irakurketa klubeko lehen saioa. HIK jarri diote izena klubari: Haurren Irakurketa Kluba. Peru Magdalena izango da saioak dinamizatzeko arduraduna, eta, azaldu duenez, Uxue Alberdiren Txikitzen zaretenean albuma landu zuten asteleheneko lehen saioan. 9 eta 10 urteko haurrei zuzendutakoa izango da klub hori, eta editorial zein genero ezberdinetako liburuak irakurri eta landuko dituzte saioetan.

“Saio bakoitzean sormen lantxo bat egitea izango da helburua, irakurritakoarekin zerikusia izango duena”, esan du Magdalenak. “Haur filosofia” metodologia baliatuko du saioetarako. Metodologia horrek haurren jakiteko grina baliatuta pentsamendu kritikoa, autonomoa, sortzailea eta arretatsua bultzatzea du helburu, pentsamenduaren alderdi kognitibotik harago joan eta memorizazio hutsa alboratuta.

“Jolasen bat ere egingo dugu saioen amaieran, eta hurrengo hilabeterako liburua aurkeztuta bukatuko dugu saioa”, azaldu du Magdalenak. Hilean behin egingo dira saioak.