Gaurkoan, nerabeek egiten duten pantailen erabileraz hausnartzeko gonbidapena luzatzen dizuegu, Oihana Elortza Gorostiza kazetariak Pakita Mateos Hernandez AGIPADeko prebentzio zerbitzuko arduradunari egindako elkarrizketa baten bidez.

Hain zuzen, DBH-1 eta DBH-2 mailetako ikasleen gurasoendako tailerra antolatu du Oñatiko Udalak, AGIPAD elkartearekin. Gurasoek seme-alabei nola lagundu landuko dute, haiek, poliki-poliki, emantzipazio digitala eskuratu arte. Lau saio ditu tailerrak; abenduaren 4an da lehena, eta izena hilaren 29a aurretik eman behar da: ongizatea@onati.eus edo 943 03 77 00.

Hemen uzten dizuegu elkarrizketa.

Zer esan gura du emantzipazio digitalak?

Familiek euren seme-alabei arlo digitalarekin zerikusia duen guztia arduraz erabiltzen laguntzea da tailer horren helburua, eta, horretarako, familiekin esku hartzea da asmoa. Hau da, jakitea zein den erabilera-adin egokia, eduki egokiak… harik eta gaztetxoek eurek gailu digitalak modu autonomoan egoki erabiltzen ikasten duten arte.

Zergatik ikusten duzu eragin behar dagoela?

28 urte daramatzat adikzioen prebentzioan lanean, eta drogen kontsumoen aurrean prebentzioaren arloan egin den lana zekarkidan burura gai horrek. Gai horretan, pantailei ezetz esateko edo gura duten beste erabiltzeko joerak daude. Drogen kontsumoan ikusi genuen inoiz ezer ez kontsumitzeko mezuak ez zuela emaitza onik lortu askotan; ezta besteak ere, noski. Horregatik, hemen ere, substan­tzien kontsumoan bezala, erdibideko bidea topatu behar da. Helduok onartu behar dugu pantailak dituen gizarte batean bizi garela eta nerabeendako sozializazioarekin zerikusia duen guztian garrantzi handia duela. Seme-alabak sozializazioan haztea gure ardura da, eta horretan ere lagundu egin behar diegu. Uste dugu arlo horretan babesgabetasun handia dagoela.

Adikzioa sor dezakete gailu digitalek?

Badaude ikerketak hori baiez­tatzen dutenak, eta, alde batetik, adikzio izan daitezkeela esan daiteke. Hala eta guztiz ere, erabilera jakin batzuek beste era bateko zailtasunak sor ditzake­te, eta ez, nahitaez, mendekotasuna. Adibidez, sare sozialen gehiegizko esposizioa, transmititzen diren balioak, onak edo txarrak ez diren informazioak baina gaztetxoen adinean ulertezinak direnak… Gertatzen dena da ez garela ari nerabeak babesten, ez politika arlotik, ezta familien­tatik ere. Kasu batzuetan, ezjakintasunagatik; eta gehienetan, erosotasunagatik. Izan ere, gu ere sareen munduan murgilduta gaude, eta, askotan, harrapatuta.

Horren kontziente gara gurasook?

Arduratuta bagaude, baina pentsatzen dugu gure erabilera ezin dela arazo bihurtu. Sareetako gure erabilerak zerikusi handia du seme-alabengan.

Ze adin zaindu behar da, bereziki?

12-13 urterekin gaztetxoak al­datzen hasten dira eta aldaketa horiek nabaritu egiten dira familian. Batzuetan, orduan hasten dira pantaila ordu gehiagoz kontsumitzen, eta askorendako errazagoa da esatea lagun digital mordoa dituztela benetako bat baino. Birsozializatze­ko garaia delako aukeratu dugu adin hori.

Zer landuko duzue saioetan?

Lehenengo saioa familiei eskai­niko diegu, eta, gero, sare so­zialek nerabeendako zer dakar­ten aztertuko dugu. Zer den hortik lortzen dutena eta zeri uko egingo lioketen gauzak al­datuta, helduok ulertzen ez ditugun gauza asko daude eta. Komunikazioaz, arauez eta mugaz hitz egingo dugu. Bertaratzen direnek gogoeta egin dezaten saiatuko gara. Lehenik eta behin, gurasoek zein unetan dauden jakin behar dute. Arazoa ez da nerabeen mugikorra. Nerabe askok zentzuz erabiltzen dituzte pantailak, baina jakin behar dugu beste batzuek zergatik ez dituzten horrela erabiltzen.