Izen bereko jardunaldia egin zuten ostegunean Mondragon Unibertsitateko Humanitate eta Hezkuntza Zientzien Fakultateko campusean.

Hezkuntzari dagozkion hainbat arlotan ardura ezberdinak dituzten hogeita hamar ordezkari baino gehiago elkartu ziren bertan. Liburua aurkezteaz gainera, gogoeta egiteko balio izan zuen jardunaldiak. Baita ere, tokiko hezkuntza-sareak sortzen lan egiten duten pertsonekin ideiak trukatzeko, hala nola ikastetxeetako zuzendariekin, irakasleekin, familiekin, udalekin eta abar.

Mondragon Unibertsitateko Humanitate eta Hezkuntza Zientzien Fakultateko dekano Nagore Ipiñak esan zuen tokiko hezkuntza-komunitateei buruz hausnartzearen garrantzia dela “lankidetzak ahalmen biderkatzailea” duelako.

Fakultateko irakasle eta ikertzaile Olaia Jimenez Arrietak aurkeztu zuen liburua eta bertan jasotako ideia nagusiak plazaratu zituen. Tokiko hezkuntza-sareen bidez hezkuntza komunitateak saretzearen garrantzia azpimarratu zuen eta horretarako zazpi gako nagusi zerrendatu zituen: komunitate konpromisoa, komunitate-konfiantza, konfiantza soziala, kooperazioa, lidergo eraldatzailea, parte-hartze komunitarioa eta helburuen arteko interdependentzia.

Mahai-ingurua eta ariketa kolektiboa

Mahai inguruaren txandan lau hizlari elkartu dziren: Errenteriako Bizarain BHIko zuzendari Josu Curiel, Arrasateko Udaleko zinegotzi Jasone Giraldo, Ordiziako Urdanetarrak Guraso Elkarteko kide Eneko Lasa eta Oinherriko kide Maite Azpiazu. Besteak beste, udalerrietan hezkuntza arloko erronka nagusiak zeintzuk diren hausnartu zuten hizlariak.

Ariketa kolektibo batekin osatu zuten jardunaldia bertaratutakoek. Taldeka hausnartzeko eta esperientziak partekatzeko aukera eman zuen ariketak.

— ‘Tokiko hezkuntza komunitateak saretzeko zenbait gako’ liburua hemen.