Harkaitz Cano idazlearen Mundua pitzatuta dago baina hantxe gabiltza oinez liburuak eskuratu du Euskadi Literatura Sariak 2024 lehiaketako saria, Euskarazko Haur eta Gazte Literatura kategorian. Lasarte-Oriako idazlearendako bere laugarren Euskadi Literatura saria izan da.

Erein argitaletxearen zigilupean dagoen liburua, Isabel Hergueraren ilustrazioekin osatuta dago. Eta epaimahaiko kideen iritziz Mundua pitzatuta dago baina hantxe gabiltza oinez liburu ilustratuak “liburutegiei omenaldia egiten die” eta “literaturaz harago, heriotza, maitasuna, senitartekoen harremanak eta beste horrenbeste gai unibertsal jorratzen ditu protagonistaren bizitzatik abiatuta” eta beste idazle asko gogora ekarrita istoriora. “Kontakizun hau baikortasunerako gonbite bat dela esan genezake”, gaineratu dute. Eta era berean, edizioari dagokionez, azaldu dute “paregabea” dela kontakizun honen irakurketarako eta ilustrazioen kontenplaziorako.

Liburuaren kontakizuna

Alabarekin nola komunikatu ez dakien aita batek paperezko hegazkin bat bidaltzen dio egunero balkoitik agur esateko. Hegazkinetan idatzitako mezuen bidez, aitak literatura-misioak jartzen dizkio alabari, liburuzain zorrotz baten konplizitatearekin argitu ditzan. Horrela, liburuen eta bizitzaren arteko lotura ezagutuko du neskatoak.

Lehen orrialdeak irakur daitezke hemen.