Joan den domekan ekitaldi berezia egin zuten hainbat familiak Antzuolan: hildako haurrak oroitzeko omenaldia. Haurren heriotzaren gainean hitz egitearen garrantziaz aritu ziren jaiaren antolatzaile Bizioza eta Hil Argi elkarteko kideak. Amaia Ramirez de Okariz kazetariak bildu zituen euren hitzak, Goiena aldizkariko erreportaje batean. Hemen uzten dizuegu:

Hil argi elkartearen ekimenez, bizipoza elkartearen laguntzarekin, gehiago gara jaia egin dute, umeak galdu dituzten familiei eta ingurukoei zabalduta, “elkarrekin une on eta goxoa pasatzeko” asmoz; jai giroan ospatu dute eguna.

“Gehiago Gara jaian elkartu garen denok, hainbat arrazoirengatik izanda ere, gure seme-alabak, ilobak, ikasleak, lagunak… galdu izanak lotzen gaitu. Guztiok sentitzen dugu mina gure azalean, eta hortik ikasitakoak elkar ulertzera eta babesgunea sortzera eraman gaitu”, adierazi dute Hil Argi elkarteko kideek, jaiaren sustatzaileek, Bizipoza elkartearekin batera.

Azpimarratu dutenez, “minak zeharkatuz”, hil diren haur horiek “bizipozetik oroitzeko” unea da, Gure irribarre bakoitza zuen omenez da lelopean: “Gure irribarrea eskaintzera baikatoz”. Eneko Iturbe eta Kristina Pavo herritarrak dira, hain zuzen ere, jaiaren antolaketan dabiltzan antzuolarretako bi, eta nabarmendu dute umeak hil zaizkien familien arteko jai bat egitea dela asmoa, “emozio guztiei tokia eginez: gure artean elkartu, babesa eman eta modu alaian momentu polit bat pasatzea”.

Horretarako, besteak beste, marraztu, dantzatu eta kantatu egingo dute, eta aurreratu dute “sorpresatxoren bat edo beste” ere izango dela. Ekitaldia “inguruan haurrak galdu dituen jendeari zuzenduta” dago, “une polit bat pasatu dezakeela ikusten duenari”.

Gehiago Gara ekimena
Gehiago Gara ekimenaren helburua “egungo gizartean haurren heriotzaren gaiaren aurrean hitz egiteko zailtasuna eta ezina eraldatzea” da, hezkuntzan, osasungintzan eta hainbat erakundetan esku hartuz, Hil Argi elkarteko kideen hitzetan: “Haurak hiltzen zaizkigunean sortzen den min handiari gehitzen zaio sarritan gizartean izaten den isiltasunak eta naturaltasunez jarduteko ahalmenik ezak eragiten duen mina. Soberan dagoen min hori gainditu nahi dugu Gehiago Gara ekimenaren bidez, eragile bakoitzak bere alorrean haurren heriotza, eta heriotza haurrekin, naturaltasunez eta humanitatez bizi izateko jarreak bultzatuz”.

Horrez gainera, ordea, bada aldarri gehiago, Iturberen esanetan: “Haurrak galdu ditugun familiek bizitzen jarraitzen dugula erakustea, hori baino gehiago garela eta oraindik bizi gaitezkeela”.