Jolanda Diazen proposamen honek hautsak harrotu ditu eta  eztabaida sortu. Guraso.eus ekimeneko Nahia Alkortak bere iritzia luzatu du sareetan. Berarekin hitz egin dugu proposamen honen atzean dauden ideien inguruan, eta bestelako aukeren inguruan.

Burua altxa eta oihu oso altu egiteko beharra sentitzen dut, sua barne-barnean haurtzaroari egin nahi zaion eraso berriaren aurrean. Haurreskolak 24 orduz zabalik egoteko proposamena egin du Espainiar Estatuko Gobernuak eta aizue… hemen ez da ezer gertatzen.

Haurtzaroari eraso zuzena da. Eta ezin dut beste era batera definitu. Alferrik hitz egingo zaigu ondoren prebentzioaz, pantailez, eskolaz… lehen hiru urteetan ez badiegu haurrei BEHAR duten hori izateko bidea errazten.

Gurasotasun baimen unibertsalak, luzeagoak eta ordainduak ezinbestekoak dira. Gaurtik. 0-3 urteko haurrentzat haurreskolak 24 orduz eskaintzearen proposamenaren aldamenean, jar dezatela 0-3 urteko haurrak gurasoekin edo erreferentziazko pertsonarekin baldintza duinetan etxean egoteko aukera. Eta ondoren hauta dezala familia bakoitzak nola antolatu nahi duen.

Lehen haurtzaroan ematen da garunaren garapenaren aldirik garrantzitsuena, eta hiru urte horietan gertatzen denak baldintzatuko du bere bizitzaren zati bat. Nola harremantzen den, nola kudeatu emozioak, nola elikatu…

Nahia Alkorta

Distopia

Soldadu edo langile esklabuak, isilak eta etsiak nahi dituen sistema bat dugu… eta bitartean, badaezpada, munstroari jaten ematen jarraituko duten gurasoak.

Nire proposamena hau da: izan ditzagun haurrak haurreskoletan jaiotzen diren unetik bertatik, eskaparate handiekin eta bideoz zuzenean etxetik ikusteko aukerarekin 24 orduz.

Kasualitatez, uneren batean, umearekin egoteko gogo azalezina eta kontrolaezina sortzen bazaizu, haurreskolara joan eta alokairu merke baten truke tartetxo batez har dezakezu. Eta nekatzen zarenean berriro han utzi. Akaso Mugi edo Barik txartelen moduko batekin eta askotan alokatzen baduzu deskontutxo batekin izan daiteke.

Haur bat baina gehiago baldin baduzu, bonus bat izango duzu, sistema ongi elikatzeagatik eta kide ugariko familiek ez dute hirugarren haurraren alokairua ordaindu beharrik izango.

Noski, ez dago alokairu minimorako derrigortasunik eta maximoa egunean 5 ordukoa izango da, ez daitezela haurrak erreferentziaz nahasi eta gurasoak enkapritxatu.

Zure haurra gustuko ez baduzu, aloka ezazu beste edozein gehigarri txiki baten truke.

Sare sozialetan argazkiak ateratzean txartelean diru birkarga automatiko bat egingo dizute, bereziki aurpegia argi edo/eta biluzik badago, adimen artifiziala eta pederastak ongi elikatzeagatik.

Haurrari uko egitea ongi ikusia izango da eta Karibera bidaia baten zozketan sartuko zara.

Neurri hauek 3 urtera artekoak soilik izango direnez, 3 urte betetzerakoan eta kartzelatik   haurreskolatik haurra kanporatzen dutenean, aurrez uko egin ez dietenek jaso eta bizirik mantendu beharko dute gutxienez 16 urte bete arte eta lanean legez hasi ahal izan arte. TikTokerren edo aktoreen kasuan, adin hori baxuagoa izango da.

Haurrak haurreskolan ez uztea erabakitzen duten familiek etengabeko epai soziala, begirada txarrak eta toki publikoetatik kanporatzea bizi beharko dute, liburutegi publikoetatik kasu.

Neurri hauekin ados ez dauden pertsonak osasun mentaleko zentruetan ingresatuko dira edo deportatuak izango dira.

Noski, haurreskoletako langileak lan baldintza prekarioetan, ratio eta burokrazia karga handiarekin eta inolako eskubiderik gabe biziko dira.

Beraz, ez zalantzan jarri sistema…

Ahal baduzu, gau ederra izan eta besarkatu gogor zure haurrak, nork daki bihar zer gertatuko den eta.