Hasi da ume sahararrak Euskal Herrira ekartzea helburu duen Oporrak Bakean programan izena emateko epea. Udan bi hilabetez ume errefuxiatu sahararrak familia euskaldun baten etxera etortzen dira programaren bidez, desertuko berotik ihes egin eta behar duten mediku arreta jasotzeko, besteak beste. Martxoaren 15era arte dago zabalik familien izen-ematea. Informazioa jaso nahi duenak webgunera jo dezake.

– – –

Laida Bengoa: “Aukera paregabea da elkartasunaren bidez Saharako haurren bizitzan aldaketa positiboa egiteko”

Oñatiko Laida Bengoa Oporrak Bakean programako harrera-gurasoa da. Gogorarazi du ekimenaren helburua dela haurrei atsedenaldia ematea, osasun-arreta bermatzea eta elikadura egokia eskaintzea. Azpimarratu du harrera-familiak behar direla.

Garrantzitsua da informazioa jasotzea eta zalantzak argitzea?
Bai, noski. Lasai asko deitu dezakete; lehen pausoa informatzea da, eta zalantzak argitzea. Askotan, kafe bat hartuz lasai hitz egiten dugu, gauzak lasai azalduz. Beti daude zalantza eta beldur asko.

Zer da zuretzat horrelako programa batean parte hartzea?

Azkenean, bertako haur bati hango beroetatik irteten laguntzen diozu. Opor polit batzuk eskaintzeaz gain, mediku azterketak, jaki aldetik hemen gabeziak ekiditea… Horrekin batera, gure kultura ezagutzen dute. Gainera, euren errealitatea zabaltzea edo ezagutzera ematea ahalbidetzen da; nik horri esker sakon ezagutu ahal izan dut Saharako herria.

Lehenengo urteetan zein izan daiteke erronka handiena?
Egoera bera ondo egotea; hasieran, normala da haurra triste edo beldurtuta egotea. Baina, aldi berean, oso polita da nola egokitzen den ikustea.

Nola azalduko zenituzke programak dituen onurak?

Esperientzia aberasgarria da; horri esker haurrek opor duinak pasa ditzakete, guretzat ere bizipen aparta baita. Aukera paregabea da elkartasunaren bidez Saharako haurren bizitzan aldaketa positiboa egiteko.