Otsailaren 15ean aldarrikatuko da Haur Minbiziaren Nazioarteko Eguna eta beste urte batez gaia lehen lerrorako ekartzeko eta sentsibilizazioa bultzatzeko hainbat ekimen egingo dira.

Adingabe Minbizidunen Familien Gipuzkoako elkarteak, Aspanogik, Elkartasun Ipar Martxa iragarri du. Elkartearen helburu nagusia da adingabe minbizidunaren eta bere familiaren bizi maila hobeagotzea eta gaixotasunaren berri ematen den unetik sortzen diren beharrei erantzun egokia ematea. “Gaixotasunaren prozesu guztian zehar eta ondoren euskarria eta akonpainamendua ematen saiatzen gara”. Gipuzkoako Foru Aldundiaren zein Donostiako Udalaren babesa jasotzen du elkarteak. “Adingabeen minbiziaren diagnostikoak ez dio soilik haien osasun fisikoari eragiten, baita ere haien ongizate psikologiko eta emozionalari. Egun batetik bestera minbiziak adingabe eta bere familiaren bizitza hankaz gora jartzen du, ohiko ekintzak ordezkatzen dira ospitaleko bisita, froga, tratamendu eta uneoroko zaintzagatik. Ospitale batean egon behar izateak eta tratamenduen ondorio fisiko, emozional eta kognitiboek beraien eguneroko ekintzetan mugak-oztopoak ezartzen dizkie eta ezberdin sentiarazi; ezin eskolara joan, ezin kirol taldeetan parte hartu, itsura aldaketak –ilea erori, argaldu edo loditu, aurpegi zurbila…). Horrekin batera, lagunen erritmo bera ezin eramatea eta harreman sozialen gutxitzea eragiten ditu gaixotasunak. Familiak adingabearekin batera bizi ditu egoera horiek, eta beraien egoera emozionalean eragina nabaria da, honi gehitu behar zaio; beldur, kezka, ezintasun, noraeza eta bestelako hainbat emozio (…) Ezinbestekoa da haur eta gazteen psikologia onkologikoan espezializatutako psikologiako profesionalen presentzia. Haien esku-hartzeak beharrezko laguntza eta zaintza eskaintzen ditu”.

Urrezko begiztak eta XII. Ipar Martxa

Gipuzkoako herriek kanpainarekin bat egitea nahi dute Aspanogi elkartetik eta urrezko begiztak udaletxeetan jartzeko deia egin dute.

Horrekin batera jakinarazi dute otsailaren 16an egingo dela aurten Ipar Martxa. Urteroko elkartasun ekintza da. “Haur eta nerabeen minbiziak ez du ez adinak, generorik , ez erlijiorik, ez talde sozialik. Gaixotasun ezezagun eta arraroa da adin txikikoen kasuan, baino errealitate bat da eta Donostiako Unibertsitate Ospitalean 30 kasu tratatzen dira). Beharrezko ikusten dugu kausa gizarteratzea eta tabuak hautsi eta horiei aurre egitea”.

Hala, Nordik Walking edo Ipar Martxa egingo dute. Adin guztietako pertsonek egin dezakete, eta ez da kirolaria izan behar. Elkartasun martxa bat da, ez lasterketa eta bi bastoiren laguntzarekin zein bastoirik gabe egin daiteke.

Izen-ematea zabalik dute hemen.