Bizipoza osatzen duten elkarte guztien artean (38 elkarte gaur egun) sortua dute dokuweb-a eta sortu zuten dokumentala ere duela urte batzuk. Urtero elkarte berriak batzen dira Bizipoza proiektura, beraz, elkarte berrien mikrodokumentalak sortu eta dokuweb-a osatzen joatea helburua da Bizipoza elkartean.

Dokuweb-ean elkarte guztien mikrodokumentalak aurkitzen dira, eta elkarteetako kideek azaltzen dute zein den beraien elkartea, zein helburu duten eta ze ekintza bideratzen dituzten egunerokoan.

2024 urtean MAREA URDIÑA ETA IÑURRI elkarteen mikrodokumentalak sortu dituzte eta dagoeneko ikusgai daude.

Iñurri

Minbiziaren akonpainamendu, formazio eta dibulgazioan ikuspegi feminista eta eraldatzaile batetik dihardun elkartea da. Inurriko kide baten amak inurriak zeramatzan orkatilan tatuatuta. Minbizi prozesu luze baten ostean hil zen, eta orduan hasi zen alaba inurri bilakatzen.  Denborarekin, intsektu txiki eta nekaezin gehiago batu zitzaizkion taldera. Eta gehiago, eta gehiago, eta gehiago. Gaur arte.

Marea urdina

Lau lagunek sorturiko autismoa duten pertsonen aldeko sentsibilizazio ekimen bat zen arren, Marea Urdinak azken urteetan zehar hartu du dimentsioa. Helburua bakarra da, INKLUSIOA (bai, letra larrietan). Inklusioa ez bakarrik eskolan, baita kirola, kultura eta aisi aldian ere. Beren bailarako aniztasun funtzionala duten pertsonak herrian sortzen diren aktibitate eta dinamika ezberdinetan leku bat izan dezaten egingo dugu lan, horretarako herriko agente eragile ezberdinei (udal, kirol elkarte, musika eskola, edozein ekimen…) inklusioaren “betaurrekoak” jartzen saiatuko dira.