Gipuzkoako Foru Aldundiko Gazteria Zuzendaritzak TREBA Nerabeak prestakuntza-programa berria jarri du abian, 12 eta 16 urte bitarteko gazteek beren garapen pertsonalerako funtsezko tresnak gara ditzaten. Programa hau 17 eta 21 urte bitarteko gazteentzako TREBA Gazteak programari gehitzen zaio, lurraldean finkatzen dena. Urtean zehar, programak lau gai-multzo handi jorratuko ditu: ongizate emozionala, begirada kritikoa, sexualitatea eta bizitzarako trebetasunak, eta arlo bakoitzean oinarrizko eta sakontzeko ikastaroak eskainiko dira.

TREBA Nerabeak Debabarrenako eskualdean –Soraluze, Deba eta Elgoibar– hasiko da apirila eta maiatza bitartean. Udazkenean, Mutriku eta Eibar batuko dira programara.

Gipuzkoako Foru Aldundiko Gazteria zuzendari Isaac Palenciak, Soraluzeko Haur eta Gazteen zinegotzi Maite Quintanilla Sarek eta Gazteria eta Hezkuntza teknikari Maialen Arangurenek egin dute programaren aurkezpena. Esan dute guztira 290 saio egingo direla Gipuzkoa osoan, eta gaiak udal bakoitzarekin adostu direla, herri bakoitzaren beharretan oinarrituta.

Izen-emateak eta informazio gehiago

TREBA Nerabeak ikastaroetako izen-emateak udalen eta gaztelekuen bidez kudeatzen dira; beraz, prozedurak ez dira berdinak herri guztietan. Agenda osoa eta saio bakoitzari buruzko xehetasun gehiago gipuzkoangazte.eus webgunean daude eskuragarri.