Azpeitiko eta Iruñetik, Beasaindik eta Donostiatik etorritako jokalariak bi orduz aritu ziren jo eta su, hainbat herritar harmailetatik begira zituztela gurpil aulki gainean futbolean. Kirol inklusiboa sustatu ez ezik, Gipuzkoan futbol modalitate horretako talde bat sortu nahi lukete antolatzaileek.

Gurpildun aulki monitorizatuetan jokatzen den futboleko modalitate hori ezagutzera ematea eta kirol inklusiboa bultzatzea izan dira egitasmoaren helburuak, eta baita Gipuzkoan talde bat sortzea ere.

Powerchair Football-eko talde bat osatu nahian dabiltza Gipuzkoan, Veronica Reyesek, ekimenaren sustatzaileak, jakinarazi duenez: “Lehen urratsak egiten ari gara desgaitasuna duten pertsonentzako futbol inklusibo bat osatzeko gurpil-aulkian. Powerchair Football kirol zirraragarria da, eta munduko hainbat lekutan ari da hazten. Euskal Herrian, ordea, oraindik ez dago ikusgarritasun eta garapen nahikorik, eta hori aldatu nahi dugu. Angelun badago talde bat, Handysport, eta harekin harremanetan gaude. Duela gutxi klub berri bat ere sortu da Nafarroan, Pamplona Bulls; bada, gure helburua orain gure probintzian talde bat sortzea da.

Hain zuzen ere, Duchenneren disofia muskularra duen Iren haurraren ama da Reyes, azpeitiarra, eta euren asmoa lau haizetara zabaldu nahian dabiltza, era horretan kirol inklusiboa susta daitekeela iritzita: “Pertsonak aktibo mantentzeko aukera emateaz gain, inklusioa, talde lana eta norberaren hobekuntza bezalako balioak ere sustatzen ditu. Funtsezkoa da pertsona guztiek, gaitasun fisikoak albo batera utzita, kirolaz gozatzeko, lagunak egiteko eta trebetasun berriak garatzeko espazioak sortzean. Gurpildun aulkian jokatzen den arren, Powerchair Football kirol mistoa da, desgaitasuna duen edonori irekia, adina kontuan hartu gabe”.