Ohiturari jarraituz, Apirilean Musika ekimena egin dute aurten ere Bergaran. Ekimenaren bueltan egon diren ekintzen artean, sehaska-kanten gaineko tailerra egin dute Alaitz Guridi abeslariak eta Edurne Saizar piano-jotzaileak. “Sehaska-kantak belaunaldiz belaunaldi transmititu diren kantu goxoak dira, haurrak lasaitzeko eta lotaratzeko erabiltzen direnak. Haurrarekin goxo egoteko, azken batean”, dio Guridik.

Loturak egonkortzen

“Sehaska-kantak eta altzoan abesteko kantuak oso garrantzitsuak” direla dio Guridik; izan ere, “haurren eta gurasoen arteko lotura emozionala indartzen dute”, haren iritziz, eta lotura hori ez galtzea bada Guridiren eta Saizarren helburua. “Behar bati” erantzuten dion tailerra da, gainera: “Gaur egungo guraso askok kantatzeko duten ohitura faltari” erantzuna, hain zuzen ere. “Umeak gozatzeko eta umearekin gozatzeko modu bat; zuzeneko hartu-eman bat sustatzeko bidea. Oso garrantzitsua da guretzat ahozko transmisioa sustatzea, ikusten dugulako gaur egungo guraso askok ez dutela kantatzeko ohiturarik edota, askotan, ez dakitela haur txikiei zer kantatu. Horren beharra sumatu dugu, eta horren harira hasi ginen tailer horiek antolatzen”, diote Guridik eta Saizarrek. Sehaska-kantek hainbat onura dakartzatela adierazi dute tailerra egin duten irakasleek: “Lotura emozionala sendotzen dute; hori, nagusiki. Motibo nahikoa bada sehaska-kantak sustatzeko. Baina, horrez gain, adituek esaten dute haurraren garapen kognitibo eta emozionalari laguntzen diotela. Gainera, hizkuntzaren garapenean ere laguntzen dute”.

Tailer praktikoa

Sehaska-kanten tailerrak “ikuspegi praktikoa” duela dio Guridik, eta, hortaz, jakinarazi du ez dela “kontzertu bat”. Tailerraren bitartez lortu nahi izaten dutena da “tailerrera etortzen direnei esperimentatzen laguntzea eta errepertorio bat eskaintzea haurrekin kanta dezaten”. Haurrei kantuak egiteko saio bat denez, “gurasoei eta zaintzaileei zuzenduta dago”; azkenean, “haurrekin harremana dutenak” dira eta. Hala ere, “interesa izan dezakeen edonori irekita” egoten dela dio Guridik.

Konfiantza kontua

Sehaska-kantak abesteko beharra sumatu badute, noizbait galdu egin direla uste dutelako, eta Guridik zein Saizarrek diotenez, hainbat faktore nabarmendu daitezke: “Alde batetik, teknologiaren eta grabatutako musikaren eragina izan daiteke, baina hori baino garrantzitsuagoa da denbora falta. Gaur egun oso azkar bizi gara eta ez dugu tarterik hartzen gure artean lasai egoteko; zuzeneko hartu-eman bat izateko. Agian, teknologia berriek ere izan dezakete zerikusi handia. Horrez gain, guraso gazte askok aipatzen digute ohiturari kez dutela, edo, zenbaitetan, ‘nik oso gaizki abesten dut’ eta halakoak ere entzuten ditugu, denok kantari profesionalak izan beharko bagenu bezala gure haurrei kantatzeko. Hori ez da horrela”. Hori dela eta, Guridik eta Saizarren azpimarratu dute “garrantzitsua” dela “gurasoek euren ahotsa erabiltzea eta horretan konfiantza hartzea. Kontuan hartu behar dugu haurrentzat ahots hori oso baliotsua dela eta ez dagoela etxeko gurasoen ahotsa baino lasaigarriagorik”.