Kilimak koadernoak sortu ditu Ikaselkar hezkuntza-argitaletxeak, 6 eta 12 urte bitarteko haurrendako. Iazko udan kaleratu zituen lehenengo bi zenbakiak, eta aurtengo udarako prest dira gainerako laurak ere. Denera, sei koaderno jostagarri, adin tarte bakoitzerako bat.

Euskaraz eta euskaratik sortuak, ikasturtean zehar landutako gaietan sakontzeko aukera ematen dute Kilimak oporretako koadernoek, modu erakargarri eta jostarian.

Euskararen ezagutza eta euskal kultur transmisioa indartzea dute helburu, oporretan ere
euskaraz jolasteko eta gozatzeko gonbidapena eginez. Gainera, ikasturtean zehar landutako
gaietan sakontzeko aukera ematen dute –matematika, gizarte eta naturaren zientziak eta
hizkuntza–, modu erakargarrian.

Gai ugari

Askotariko gaiak eta jarduerak daude Kilimak koadernoetan, euskal testuinguru batean kokatutakoak, gainera. Besteak beste, euskal mitologia edota Gure Zirkua ageri dira, Euskal Herrian zehar bidaiatzeko aukera eskainiz.

Sei koaderno guztira

Lehenengo lau koadernoek egitura beretsua dute; sei atalez osatuta daude, eta atal bakoitzaren
hasieran misterio edo enigma bat aurkeztuko zaio irakurleari. Hurrengo orrialdetan misterioa
argitzeko erronkak gainditu beharko ditu, pistak jarraituz. Horrez gain, euskaraz jolasteko esaerak, zotz egiteko formulak, kantuak eta beste topatuko ditu.

Kilimak 5 eta 6 koadernoek, berriz, beste era bateko proposamena dakarte; gaiak zein estetika 10-12
urte bitarteko gaztetxoei bideratuta daude. Atal bakoitza komiki batekin hasten da eta irakurleak
komiki bat pausoz pauso sortzen ikasteko aholkuak eta trikimailuak jasoko ditu. Elkarrizketak
ere badaude. Gainera, denborapasak, esperimentuak eta eskulanak ere badaude.

Ekainetik aurrera eskuratu ahal izango dira Kilimak koadernoak, Euskal Herriko liburudenda eta ohiko salmenta puntuetan.