Gizartearen “ertzetan” dauden hainbat gai ekarri nahi dituzte erdigunera, udalekin, ikastetxeekin, eta hezkuntza ez arautuko eragile eta elkarteekin batera. Horretarako, 80.000 euroko ekarpena egin du Fagorrek, Debagoienean Bizipoza Eskola zabaldu ahal izateko.

Fagorrek eta Bizipoza elkarteak hitzarmen bat sinatu dute Debagoieneko ikastetxeetan, hezkuntza ez formaleko eremuetan eta herrigintzako espazioetan Bizipoza Eskola zabaldu dadin. Antzuola Herri Eskolan egin dute aurkezpena, eta han izan dira: Aritz Otxandiano Kanpo, Fagor Taldeko Iraunkortasun arduraduna; Joseba Labaka Eskudero, Bizipoza elkarteko lehendakaria; eta Leire Elizegi Beloki, Bizipoza Eskolaren koordinatzailea.

Bizipozaren helburu nagusia da “denona eta denontzat beharko lukeen Euskal Herri inklusibo bat eraikitzea”, “euskaratik eta euskaraz”, eta, horregatik, sortu dute Bizipoza Eskola, “pertsona ororentzat izango den mundu baterantz egiteko heziketa, baliabide eta tresnak biltzen eta eskaintzen dituena”.

“Bizipoza Eskolak, batetik, gida didaktikoak jasotzen ditu bere baitan; bestetik, materiala du, elkarte horiek guztiek lantzen dituzten gaiak oinarri hartuta; azkenik, bada egutegi bat ere, gai horiek guztiak zein nazioarteko egunetan kokatuta daudenak jasotzea dituena”, azaldu du Elizegik.

Sinatu duten hitzarmenaren helburua da Bizipoza Eskolaren programa didaktikoa Debagoienean zabaltzea. Horretarako, Bizipoza elkartearen eta Debagoieneko herrietako udalen, gazte eragileen eta hezkuntza arautuko zein ez arautuko eragileen arteko elkarlanean oinarritutako dinamika bat abiaraziko dute, eta aurreikusita dituzte urratsak, Elizegiren hitzetan: “Ja hasi eta uztaila bitartera arte herriz herri udal, ikastetxe, hezkuntza ez arautuko eragile eta elkarteekin harremanak hasiko ditugu, sarea egitean hasiko gara, eta helburua izango da, batetik, hori guztia partekatzea, elkar entzutea eta elkarrengandik jasotzea, eta, bestetik, hurrengo ikasturterako plangintza elkarrekin adostea”.

Gizartearen ertzetan dauden hainbat gai ekarriko dira erdigunera, pertsona ororen eta pertsona ororentzako behar lukeen Debagoiena inklusiboa eraikitzeko: “Hor dauzkagu gaixotasun larriak ez ezik, aniztasun funtzionalak, heriotzaren pedagogia eta dolua, eta beste hainbeste gai, eta saiatuko gara zeharka begiratzen ditugun gai horiek plazaratzen eta elkarlanean denonak egiten, denon artean normalizatzen”.

Ekarpen ekonomikoa

Fagor Taldeak, bere aldetik, badauka konpromiso bat gizartearekin, eta bera parte den komunitate eta taldeekin. Fagor nagusiki Debagoienean dago kokatuta, eta eskualdeko erronkei aurre egiteko konpromiso berezia du. Inklusioa da momentuan duten gizarte erronketako bat, eta eragile ezberdinekin elkarlanean eta komunitatearekin auto-eraketaren bitartez, erronka horiei erantzuna bilatzeko euren ekarpena egiten du. Oraingoan, ekonomikoa, 80.000 eurokoa. “Gero eta gizarte anitzagoetan bizi gara, kultur aniztasuna, behar bereziak dituzten haur eta familiak, gure gizartearen errealitate bat da hori guztia, eta lanketa bat eskatzen duena denontzako eta denon artean eraikitako gizarte bat eduki ahal izateko”, adierazi du Otxandianok.