Bakar, bakarrik, bakartua, bakardadea….
Zer piztu da zugan hitz horiek irakurtzean? Matiz ugari dago batetik bestera. Nora jo du zure irudimenak azkeneko hitza irakurrita?
Heriotzaz bezala, bakardadeaz hitz egitea sarri zaila egiten zaigu. Askotan, haren atzean dauden egoerak, egiturak eta gorpuzten diren sentipenak ikusi edo bizi nahi ez bagenitu bezala.
Zurea, gurea, komunitatearena… Bakardadea gurean badago ere, ez gaitu guztioi berdin jotzen, eta bakoitzaren erantzuna ere ezberdina izan daiteke. Inguruak eta komunitateak badute eragina eta askotan, egoerak hauek iraultzeko indarra ere. Gogoeta hori abiapuntu hartuta, pasa den abenduan jarduera ugari egin genituen Oiartzunen, bakardade hitzaren atzean dagoen horri presentzia emateko. Elkarrekin hitz egitea, elkarri entzutea eta elkar ezagutzea ziren gure helburu nagusiak. Parte hartzea ez zen inposatua, eta une oro sortu ziren espazio seguruak; hitzaren bidez, irudiaren bidez, dantzaren bidez… komunikatzeko zailak diren bizipen horiei aterabide emanez.
Goxotasuna, adi egoteko jarrera eta presentziaren indarra, elkar zaintzeko eta topaketarako espazioak sortzeko filosofia bihurtu ziren. Eta hala aritu ginen hainbat egunetan. Besteen begietan bakardadea ikusteko aukera izan genuen, baita bestelako adierazpenetan ere: ahotsaren bidez, gorputz mugimenduaren bitartez, marrazkietan… Modu horretan, askotan isilik gelditzen diren hizketaldiak plazaratzeko espazioak eraiki genituen.
Argi geratu zen bakardadeak ez duela adinik, eta hautatutako bakardadeak bakea ere ekar dezakeela. Helduenek adierazi zuten gaur egungo eta beraien gaztaro garaiko bakardadeak desberdinak direla, baina minak antzeko oihartzuna duela. Urteen poderioz bakardadea forma batetik bestera aldatzen bada ere, sortzen duen korapiloa berdintsua da. Oso polita izan zen bakardadean bizi zen pertsona batek eta harreman sare sendoa zuen beste batek elkarrekin hizketan hasi eta etxerako bidea elkarrekin egin zutela lehen aldiz ikustea, nahiz eta bizilagun diren. Sortutako espazioak bien arteko ulermena eta gertutasuna ahalbidetu zuen.
Hausnartu genuen egiturazko bakardadetik hautatutako bakardadera kolore ugari daudela, eta hura bizitzeko modu anitzak. Eta hori ez da nolanahiko kontua. Bakardadea ez baita hitz soil bat, bizipen bat baizik, eta hark gure begirada eta presentzia eskatzen du.
Ekintzen inguruko informazio gehigarria hemen:
https://www.haziak.eus/bloga/bakardadea-eta-laguntasuna-gazteen-begietatik
Iruzkinik ez "Bakar…"