Seaskak ekainaren 28an egin zuen urteko biltzar orokorra, Kanbon, eta hantxe bozkatu zuten bigarren lizeoaren proiektuari buruzko egitasmoa. 2027ko irailean irekiko ditu ateak lizeo berriak, Donapaleun.

“Azkenean, Donapaleun, ikastola ondoan, oinez errugbi eta futbol zelaien ondoan, bi polikiroldegiren ondoan, piszinaren ondoan eta herrigunetik oinez hurbil den gunean kokatua den lur sailean eraikitzea erabaki du Seaskak, Donapaleuko Herriko Etxearen eskaintza onartuz”, zehaztu dute ikastoletako ordezkariek. Lizeoa berriari buruzko proposamen bakarra izan zuten mahaigainean Seaskaren biltzar nagusian, eta horixe onartu zuten batzarrera joandakoek –Ikastolen Kontseiluak Lapurdi, Baxe Nafarroa eta Xiberoko 39 ikastolen 140 ordezkari bildu ziren–.

Orain arteko lizeoa Baionako Bernat Etxepare lizeoa da –orokorra eta Lanbide Heziketa– baina bost kolegioetatik urtero horra joaten den ikasle kopurua aintzat hartuta, bigarren lizeo bat sortzeko beharra agerikoa zela ikusten zuten. Egun, lehen hezkuntzan ikasleen %13a eskolatzen dute Iparraldeko ikastolek, lizeoan, berriz, %6a.

Donapaleuko lizeoa 2027 urtean irekiko da eta 180 ikasle hartu ahalko ditu hastapenean. Baionan bezala, barnetegi bat gehitzeko proiektua badu Seaskak. Lizeo berriak milioi bat euroko kostua izanen du.

Iturria: Kazeta